Naalakkersuinikkut iliuuseqarneq naammanngilaq

Avatangiisinut Naalakkersuisup, Arkalo Abelsenip, naalakkersuisooqatigiinnullu illuatungiliuttut Inuit Ataqatigiit siulittaasuata, Kuupik Kleistip, Itisiliineq TV-kkut ippassaq unnukkut aallakaatinneqarmat nassuerutigaat, silap pissusaata allanngoriartorneranut naalakkersuinikkut iliuuseqarneq naammanngitsoq, kingusinaartumillu massakkut aatsaat iliuuseqartoqarnialersoq.
septembarip 13-at 2007 06:40

Arkalo Abelsen taamaattoq oqarpoq, silap pissusaata allanngoriartornera pillugu ukiaru oktobarimi isumassarsioqatigiittoqassasoq, tassanilu pisortanit susassaqartut, piniartut aalisartullu kattuffii peqataatillugit, iliuusissiornissaq sammineqassasoq.

Inuit Ataqatigiit siulittaasuat, Kuupik Kleist, oqarpoq, silap pissusaata allanngoriartornera pillugu ilisimatusarnerunissamut piffissanngortoq.

- Pisoqareeraangat aatsaat qisuariartaratta, Qaanaamilu piniartut atugaat taamatut pisarnermut assersuutaalluarsinnaasoq, Kuupik Kleist oqarpoq.

Pinngortitaleriffimmi sila pillugu ilisimatooq, Søren Rysgaard, Itisiliinerup qallunaatuaani oqarpoq, nunanit allanit ilisimatuussutsimik katerseqqaarnissaq pingaaruteqartoq.

-Taava takusinnaalissavarput ilisimatusarnissami sukkut aallartissanerluta, ilisimatuussutsikkummi paasisat politikkikkut aalajangiinissanut tunngavissioqataalluinnarmata, Søren Rysgaard erseqqissaateqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq