Naalakkersuinikkut akuliunnissaq ernumagaat
Naalakkersuisut siulersuisunut ilaasortassanik pingasunik, Ilisimatusarfiup innersuussutigisaasa avataaneersunik toqqaanerminnik nassuiaateqareersullu taamatut ernummateqarneq minnerulinngilaq.
Ilisimatusarfimmi siulersuisussatut toqqarneqartut ilaat marluk tassaapput Siumup Folketingimut qinigassanngortitaa Mininnguaq Kleist, naalakkersuisut allattoqarfianni immikkoortortami pisortaasoq aamma Robert Mossing, KIIIN-imi ilinniartitaanermi aningaasaqarnermik suliaqartuusoq.
Ilisimatusarfimmi ilinniartitsisoq Kenneth Pedersen isumaqarpoq siulersuisunngortut naalakkersuinermut tunngassuteqarpallaaluatsiartut.
- Siulersuisuni ilaasortanngortut ilaannut Ilimmarfiup naalakkersuinikkut avissaartinneqarnissaanut tunngaviusussap atuutsinniarnissaa ajornakusuussaaq, tamannami aqutsinissamut inatsimmi nutaami tunngavigineqarmat. Tassa naalakkersuinikkut aqutsineq aamma universitetimik aqutsineq immikkoortilluinnarneqassasut, Kenneth Pedersen oqarpoq.
Kenneth Pedersen aperineqarpoq siulersuisuni ilaasortanngortut ilaat Namminersornerullutik Oqartussani atorfikkaajummata suna ernumanartoqartinneraat.
- Siulersuisuni ilaasortat ilaat naalakkersuisunut naalakkersuisoqarfinnullu ima attuumassuteqartigipput, allaat Ilimmarfimmut atatillugu aalajangiinissanut attuumassuteqarpallaarnerat ernummatigineqarsinnaalluni. Tassami immaqa natsatik taarsertariaqartassavaat. Soorlu naalakkersuisoqarfiup soqutigisai imaluunniit Ilimmarfiup soqutigisai aallutissaneraat apeqqutigineqarsinnaassammat. Tamannalu ajornakusoortorujussuangorsinnaavoq, Kenneth Pedersen oqarpoq.
Aqagu ullaap tungaani qulinut radiukkut Oqalliffimmi Ilimmarfimmi Ilisimatusarfiup siulersuisortaavi oqallisigineqassapput. Ilimmarfiup siulersuisussaattut Ilisimatusarfiup innersuussutaanni, innersuunneqartut kalaallinut ilisimasaat isiginninnerallu naammanngimmat, Naalakkersuisut allarluinnarnik pingasunik toqqaapput. Taamatut toqqaaneq isornartoqartillugu Lene Knüppel Demokraatineersoq apeqquteqarmat, naalakkersuisut taama akissuteqarput.
