Naalagaaffimmi pissutsinut ministereqarfik atorunnaarsinneqarpoq
Danmarkimi qangaaniilli ministeeriaqarfiusoq, naalagaaffimmi pissutsinut ministeeriaqarfik, ilaatigut kommuninik nakkutilliiviusoq, naalakkersuisunngortitsinissamut atatillugu atorunnaarsinneqassaaq. Suliassaq taanna atugarissaarnermut ministeeriaqarfimmit nutaajusumit isumagineqalissaaq.
Naalagaaffimmi pissutsinut ministeeriaqarfiup atorunnaarsinneqarneratigut kommunit allatut periuseqarfigineqalissasut, Socialdemokratit Næstvedimi borgmesteriutitaat Henning Jensen isumaqarpoq. Taanna Kommunit Kattuffiata siulittaasoqarfiani ilaasortaavoq.
- Tamanna nuannersumik isigissagaanni tamatuma kingunerisinnaavaa kommunit aqunneqarpallaarunnaarlutik namminersortinneqarnerulissasut, tassami naalagaaffimmi pissutsinut ministerimit nakkutigineqarunnaassagatta, Henning Jensen Ritzauimut oqarpoq.
Taassuma aamma maluginiarpaa manna tikillugu naalagaaffimmi pissutsinut ministeriusoq Lars Løkke Rasmussen aningaasaqarnermut ministerinngussammat.
- Qujanaqaaq taanna kommunit aningaasaqarnerat pillugu isumaqatigiinniarfigisassagatsigu. Tassami kommunit ilisimasaqarfigai, aningaasaqarnermut ilisimasaqarluarluni piginnaasaqarluarlunilu. Qularnanngitsumik taassuma siunissami nakkutigissavaagit, Næstvedip borgmesteria oqarpoq.
