Naalagaaffimmi atorfillit akissarsiaat qaffalaaminissapput
Isumaqatigiissusiornermi akissarsiat qaffanneqanngillat aatsaalli aappaagu 2012-mi akissarsiat 1,7 procentimik qaffanneqassallutik.
Namminersortut suliffeqarfiini akissarsiat malinneqartarnerattut pisimagaluarunik, naalagaaffimmi atorfillit akissarsiaat 1,48 procentimik appariartussaagaluarput. Ukiunili tullerni naalagaaffimmi atorfillit akissarsiaannut appariaataasussaagaluanut eqqorneqassanngitsut, Aningaasarsiornermut ministerip, Claus Hjort Frederiksenip oqaatigaa.
- Isumaqatigiinniarnermi inernerusoq naammagisimaarpara, ukiunimi tullerni atorfillit akissarsiamikkut siuariartussammata, aappaatigullu aamma nunarsuatsinni aningaasarliorneq isumaqatigiinniarnermi eqqaarsaatigisariaqarsimavarput. Taamatullu iliornerput tamarmi ilorraap tungaanut aallarmat tamanna naammagisimaarpara, Claus Hjort Frederiksen oqarpoq.
Akissarsiat isumaqatigiissutigineqarneranni politiit sakkutooqarnermilu atorfillit, siusinaartumik soraarnerusutisiaqartarnissartik annaavaat.
Tassa imaappoq, sakkutuuni atorfillit 60-inik ukioqalernermi soraarninngorsinnaajunnaarput, politiillu 63-inik ukioqalernerminni tamakkiisumik soraarnerusutisiaqarsinnaajunnaarlutik.
Politiit sakkutuullu siusinnerusukkut nalunaarutigigaluarpaat, soraarninngorsinnaanermut ukiut ammut killissarititaasut amerlineqassanngitsut, tassami namminneq suliatik nukkiornartut eqqarsaatigalugit utoqqalipallattaramik.
