Naalagaaffiit tamalaat akuliuteqquneqarput
Inuit pisinnaatitaaffiinut atorfilittat qullersaata, Navi Pillayip, oqaatigaa, Libyap pikitsitsisunut saassusseqattaarnerata unitsinnissaanut, nunat Naalagaaffinnut Peqatigiinnut ilaasortaasut aningaasat atorsinnaasatik tamaasa atortariaqaraat.
Inuit pisinnaatitaaffiinut suliniaqatigiiffiup siusinnerusukkut oqaatigaa toqutaasut 300-t missilioraat, kisiannili Italiap nunanut allanut ministeriata toqutaasut tusindtit missiliussagaat ippassigami oqaatigalugu.
Libyami massakkut pisut pissutigalugit nunani tamalaani suliniaqatigiiffiit arlallit ataatsimiigiaqqusisaqattaarput.
Natop pisortaa Anders Fogh Rasmussen Libya pillugu tuaviortumik ataatsimiigiaqqusivoq, taamaattorli erseqqissaatigalugu Nato akuliunnissaminik pilersaaruteqanngitsoq.
Naalagaaffiit Isumannaallisaaniaqatigiivi Libyamut pillaatitut iliuusissat oqaluuseriniarlugit ullumi aamma ataatsimiinniarput. EU-mi nunanut allanut tunngasunut qullersaq, Catherin Ashton, oqarpoq, EU pillaatitut iliuuseqarnissaminik oqaluuserinnittariaqartoq.
Libyami qanorpiaq pisoqarnera suli ersernerluppoq. Gaddafip malittaasalu illoqarfiit pingaarnersaat Tripoli suli pissaaneqarfigaat, tunniutiinnarniaratillu, pikitsitsisulli illoqarfiit pingaarnersaannut qanilliartuinnartut maanna oqaatigineqarpoq.
