Naalagaaffiit pissakilliortut aningaasatigut taperneqarsinnaassapput

Naalagaaffiit qullersaasa EU-mi ataatsimeereerlutik nalunaarutigaat, nunarsuatsinni naalagaaffiit pissakilliortut silap pissusaata allanngoriartornera akiorniarlugu iliuuseriniakkaminnut aningaasatigut taperneqarsinnaassasut. Kyotomili isumaqatigiissut naapertorlugu co2-mik mingutsitsinerup annikillisarnissaanut nunat ineriartortut EU-miit aningaasanik qanoq amerlatigisunik taperneqarsinnaanersut saqqummiunneqanngilaq. Nunatsinniit Naalakkersuisut, SIK-p sulisitsisullu peqatigiiffiisa, Kalaallit Nunaata co2-mik mingutsitsinermut atatillugu immikkut isumaqatigiissuteqarnissaa piumasarereernikuuaat.
marsip 20-at 2009 17:06

Bruxellesimi naalagaafiit qullersaasa ataatsimiinneranni angusat ministeriunerup, Anders Fogh Rasmussenip, iluarisimaarpai. EU-miilli silap pissusaata allanngoriartornera akiorniarlugu iliuuseriniakkanut tapiissutigerusutat annertussusilerneqanngimmata, EU-mut akerliusut isornartorsiorpaat. Anders Fogh Rasmussenili oqarpoq, naalagaaffiit tapersersuisinnaasut suli ersarissumik isumaqatigiissuteqanngimmata tapiissutigisinnaasat annertussusilerneqanngitsut. Københavnimili ataatsimeersuarnissaq sioqqutingaatsiarlugu, naalagaaffiit qanoq iliuuseqarsinnaasut allanullu tapiisinnaasut, ataqatigiissaakkamik iliuuseriniakkaminnik pilersaarusioreerpata tapiissutigisinnaasat annertussusilerneqarnissaat naatsorsuutigalugu, Anders Fogh Rasmussen oqarpoq. EU-mi ilaasortat qullersaat juunip qaammataani naapeqqissamaarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq