Naalagaaffiit Peqatigiit USA-lu sakkuaakkunnaarsitsisinnaapput
Amerikamiut nunanut allanut ministeriat Condoleezza Rice isumaqarpoq Naalagaaffiit Peqatigiit USA-lu suliniuteqarnermikkut sapaatip akunnerani uani Kangiani Qiterlermi sakkuaakkunnaartitsisinnaasut. Israelimiulli oqarput nunat tamalaat sakkutuuliippata aatsaat tamanna pisinnaasoq.
Nunarsuarmioqatigiit annerusumik minnerusumilluunniit sakkuaakkunnaartoqarnissaanik eqqisseqatigiittoqarnissaanillu isumaqatigiipput, israelimiut ataatsimeeqatigereerlugit amerikamiut nunanut allanut ministeriat Condoleezza Rice oqarpoq.
- Sapaatip akunnerani uani sakkuaakkunnaarnissaq eqqisseqatigiinnissarlu angusinnaagigut upperilluinnarpara. Libanonimiut nunaminnik oqartussaanertik taamaalillutik angusinnaavaat. Israelimiullu pikititsinianik saassunneqartarnerat taamaalilluni aamma unitsinneqarsinnaavoq, amerikamiut nunanut allanut ministeriat Jerusalemimiit timmisartorluni aallanngitsiniarnermini taama oqarpoq.
Israelimiulli illersornissamut ministeriat oqarpoq ingasattajaarlutik saassussisarnerit aallartiinnaqinammata namminneq sakkuaakkunnaartoqarnissaa isumaqatiginagu. Israelimi radioaviisi tusarliivoq Israelip avannaani nunat tamat sakkutuuliissappata aatsaat sakkuaakkunnartoqarsinnaasoq. Israelimiut ippassaq 48 tiimini silaannakkut qaartartumeerisaqattaarnitik unitsikkallarniarlugit nalunaarput. Taamatut qaartartumeeriunnaarallarnerup nalaani Libanonimi toqutaasut timaasa ujarneqarnissaat ilineqarnissaallu anguniagaavoq kiisalu Libanonimiut qimarngunissaannik periarfissiinertut taamaaliorneq taaneqarsinnaalluni.
Silaannakkut qaartartumeeriunnaarallarneq aatsaat atortinneqassaaq hizbollah-kkut qaartartumeeriunnaarpata.
