Naalagaaffiit Peqatigiit siunnersuisinnaanngussapput
Meeqqat Inuusuttullu Pillugit Ilisimasaqarfik ullumi nalunaarusiami pingajussaat saqqummiuppaa, saqqummiussinermi nalunaarusioqataassoq Steen Wulff ilaatigut ajornartorsiutip annertussusaanik nalunaarusiap aappaanniit tigulaarilluni erseqqissaavoq, oqarluni inoqutigiit meerartallit 39 procentii 2004-imi ikiuutinik isumalluuteqartariaqarsimasut.
Steen Wulff inatsisilerituujusoq aperigatsinni suna paasiniaanerminni ersarinnerpaajunersoq imak nassuiaavoq.
Ersarinnerpaajusoq tassaavoq naalagaaffiit peqatigiit meeqqat pisinnaatitaaffii pillugit isumaqatigiissutaanni piumasarisaasut inorlugit meeqqat inuuneerat, tassani erseqqissassaaq meeqqat inoqutigiinni naammanngitsumik isertitalinni angerlarsimaffeqartut pineqarmata.
Nalunaarusiap kingunerisinnaasai apeqqutigigatsigit Steen Wulff imak akivoq:
Siusinnerusukkut Naalagaaffiit Peqatigiit Meeqqat atugaannut atatillugu suleqatigiissitaanut paasissutissanik ilisimasanillu tunniussisinnaaneq naammassimanngilaq. Taamaattumillu taassuma siunnersuisinnaanera amigarsimalluni. Tassa imaappoq ilisimasat paasissutissanillu katersuisinnaaneq naammassimanngilaq. Maanna tamanna allanngorpoq tassami MIPI sakkuliullugu paasissutissaanik ilisimasanillu katersuisoqarsinnaanngorpoq taamaalillunilu kalaallit nunaanni meeqqat atugaannik pitsanngorsaanissamut Naalagaaffiit Peqatigiit Meeqqat atugaannut atatillugu suleqatigiissitaa siunnersuisinnaanngorpoq.
