Naalagaaffiit Peqatigiit qullersartaassaat

Naalagaaffiit Peqatigiit qullersaat, Kofi Annan, ukiup naalernerani pilersaarutit malillugit atorfimminit tunuarpat, nunanut allanut Koreami Kujallermi ministeri, Ban Ki-Moon, tassaassagunarpoq tullinnguulluni qullersanngortussaq.

Nunanit Naalagaaffiit Peqatigiinnut isumannaallisaaniaqatigiivinut ataavartumik ilaasortanit tallimanit – Storbritanniamit, Ruslandimit, USA-mit Kinamit aamma Frankrigimit – Ban Ki-Moon ataasinngormat unnukkut tapersersorneqarluareersorlu tamanna ilimanarsivoq.

Naalagaaffissuit taakku tallimat tapersersuinerat pissutigalugu Ban Ki-Moonip Annanimik taarsiinissaa ilimanarsilluinnarpoq, Indiallu qinigassanngortitaa, Shashi Tharoor, Naalagaaffiit Peqatigiit isumannaallisaaniaqatigiivini persuarsiornanngitsumik taasisoqareernerani unammillertiminut Banimut pilluaqqusivoq.

Isumannaallisaaniaqatigiit aalajangereerpata aalajangivinneq Naalagaaffiit Peqatigiit ataatsimeersuarneranni pissaaq, tamannali ileqquusumik pisarpoq.

Ban Ki-Moon tassaanerarneqartarpoq angut sakkortooq qajassuartorli, aamma qallikkut sallaatsutut imminut siusinnerusukkut taareerpoq.