Naalagaaffiit Peqatigiit: Piitsut eqqugaanerpaassapput
- Silap pissusaata allanngoriartornerata nunat tamat nunarsuarmi piitsuussuseq akiorniarlugu ilungersuutaat asuliinnartissavai. Naalagaaffiit Peqatigiit ineriartortitsinermut immikkoortoqarfia UNDP nalunaarusiamini taama inerniliisoq, Politiken nittartakkamini allaaserinnippoq.
Nalunaarusiami ’Silap pissusaata allanngoriartorneranut sorsunneq: Nunarsuarmi avissimasumi inuit nammaqatigiinnerat’-nnik taaguutilimmi, oqaatigineqarpoq annerusumik nunarsuatsinni inuit piitsuunerpaat silap pissusaata allanngoriartorneranit eqqugaasut.
Desmond Tutu, siusinnerusukkut Afrikami Kujallermi biskopiunerusoq nalunaarusiami allaaserisaqarpoq.
- Silap pissusaata allanngornerinut sakkortuunut atatillugu inunnik assigiinngisitsineq nutaaq pilersissimavarput. Nunat suliffissuaqarfiusut silap pissusaata allanngorneranut pisuusut, allanngornerit ajunngitsumik atorpaat – naak inuit miliuunilippassuit nunani piitsuusuni najugallit eqqugaanerpaasut, massa ajornartorsiummut pisuussuteqanngikkaluarlutik. Desmond Tutu allappoq.
Nalunaarusiami ilaatigut uparuarneqarput Canada, Kyotomi anguniagassatut isumaqatigiissutinik akuerseqataaffigisaminik sumiginnaanerarneqartoq, Europami biililiorfiit biilit ingerlatissaannik pitsaanerusunik anguniagaqarnermik akornusersuineragaasut kiisalu EU inuussutissarsiortunut avatangiisinut iluaqutaasussamik akitsorterussinermut taarsiullugu CO2-mik aniatitsisunut akuersissutinik agguaasutut.