Naalagaaffiit Peqatigiit isornartorsiorpaat

Irakimi præsidentiusimasup, Saddam Husseinip, inuiaqatigiinnut pinerlussimanini pillugu toqumut pillagaaaneranut tunngatillugu, Irakimi eqqartuussiviit Naalagaaffiit Peqatigiinnit sakkortuumik isornartorsiorneqarput.

Eqqartuussiviup qanoq iliorsinnaanermut uppernarsaata uppernassusaalu nalorninarpoq, Inuit Pisinnaatitaaffiinut Naalagaaffiit Peqatigiit siunnersuisussatut ilisimatitsisartussatulllu toqqarsimasaat, Leandro Despoy, aalajangersumik oqarpoq.

- Eqqartuussivik tigusaaqqanerup nalaani pilersinneqarnikuuvoq, eqqartuussivillu inatsisinik unioqqutitsinikkut ingerlanneqartutut inuppassuit nalilertarpaat. Eqqartuussisut tamarmik aamma irakimiusut innuttaassuseqanngillat – eqqartuussivillu USA-miunerusoq aningaasalersorneqarpoq, paasisimaqarluartut Naalagaaffiit Peqatigiinneersut uparuaapput.

Naalagaaffiit Peqatigiit inatsisilerinermut suliaqartuata aamma paasititsissutigaa, eqqartuussineq inuit nunarsuaq tamakkerlugu pisinnaatitaaffiinut naapertuutinngitsoq.

Leandro Despoy naapertorlugu Kangiani Qiterlermi 1990-mi sorsuttoqarnerani sakkutuunik allamiunik malersuinissaminut, kiisalu 2003-mi maajip ulluisa aallaqqaataata kingorna sorsunnermi pinerluuteqarsimasunik, Irakimi eqqartuussivik malersuinissaminut aamma pisinnaatitaanngilaq.

Tassa Irakip tiguagaanera taamani aallartimmat.