Naalagaaffiit issittormiut unioqqutitsinertaqanngitsumik aalisarnissaq isumaqatigiissutigaat
Issittup Imartaata aqunneqanngitsumik aalisarfigineqarnissaa pinngitsoortinneqartariaqartoq naalagaaffiit tallimat sineriallit issiitumiittut tamanna isumaqatigiissutigaat.
Isumaqatigiissutissaq pillugu isumaqatiginninniarnerit pitsaasumik ingerlasut, Naalakkersuisut nittartakkaminni allapput.
- Issittup Imartaa pingaaruteqarpoq, aamma Kalaallit Nunaata aalisakkanik pisuussutaanik piujuaannartitsinissamut tunngatillugu. Nuummi isumaqatigiissutissap isumaqatiginninniutiginissaanut alloriarujussuarneq nuannaarutigaara, isumaqatigiissutillu naalagaaffiit aalisarnermik ingerlataqartut ataatsimoorluta Issittumi Imartatsinni aqunneqanngitsumik aalisartoqarnissaa pinaveersimatissavaa, Aleqa Hammond ataatsimiinnerup kingorna taama oqarpoq.
Tamatumunnga atatillugu Aalisarnermut Naalakkersuisup Finn Karlsenip Issittup piffissami matumani soqutigineqarnerujussua oqaatigaa.
- Unioqqutitsisumik akisussaaffeqanngitsumillu tamaani aalisalernissamut pinaveersaartitsinissatsinnut assissaqanngitsumik matumani periarfissaqarpugut. Aalisarfiulersussat nutaat mianersortumik aalisarfigineqartarnissaat siumungaaq aalajangersaaffigineqarnissaannut periarfissaqarsinnaalluta. Taamaattumik Nuummi ataatsimiinnermi anguneqartut naammagisimaarpakka. Tassami naalagaaffiit sineriallit tallimat suleqatigiillutik akisussaaffilimmik issittup imartaata nakkutigineqarnissaanik isumaqatigiillutik angusaqarmata, Finn Karlsen oqarpoq.
