Naalagaaffeqatigiit Ilulissani ataatsimiissapput
Tysklandimi forbundskansleri, Angela Merkel, Danmarkimi ministeriunerup, Anders Fogh Rasmussenip, aamma Naalakkersuisut siulittaasuata, Hans Enoksenip, aqagumiit Ilulissaneeqatigisussaavaat, silaannaap allanngoriartornera sermersuarmi Ilulissallu kangerluanni Angela Merkelip paasisaqarfigerusummagu, taamaammat naalagaaffeqatigiinneq pillugu ataatsimiinnissaq Ilulissani pissasoq aalajangiunneqarpoq.
Angela Merkel tikeraareerpat Savalimmiuni lagmandi, Joannes Eidesgaard, Ilulissanut tikissaaq, taavalu naalagaaffeqatigiinnermi nunanut taakkununnga ataatsimoortumik suut soqutiginaateqarsinnaanersut politikerit taakku pingasut oqallisigissavaat.
Ukiumoortumik ataatsimeeqatigiittarnerit persuarsiornanngitsumik ingerlanneqartarput, aalajangersimasunik oqaluuserisassaqarneq ajorpoq, pisortallu taakku allanit peqataaffigineqanngitsumik ataatsimiissapput. Taakku oqaloqatigiinneranni atorfilittat inimi allami katerissapput, namminneq aamma soqutigisatik oqaloqatigiissutigissallugit.
Naalagaafeqatigiinneq pillugu ataatsimiittarnerit ukiuni tulleriiaani arlalinni ingerlanneqareerput. Ataatsimiinnerit Danmarkimi, Savalimmiuni Kalaallit Nunaannilu paarlakaattumik ingerlanneqartarput.
