Naalagaaffeqatigiinnermut Issittumullu ministereqalernissaa IA-p piumasarigaa
Inuit Ataqatigiit isumaqarput danskit naalakkersuisui Folketingimut qinersisoqareerpat naalagaaffeqatigiinnermut Issittumullu ministerimik toqqaasariaqartut.
Susassaqarfinnimi taakkunani suliassarpassuupput, Inuit Ataqatigiit siulittaasuat isumaqarpoq. Danskit partiivisa amerlanerpaartaasa naalagaaffeqatigiinneq pillugu pisortatigoortumik tigussaasumillu qineqqusaarutiminni ilanngussaqarsimannginnerat aamma isornartorsiorpaa:
- Qineqqusaarnermi matumani partiit taama ikitsigisut naalagaaffeqatigiinneq Issittorlu pillugit politikkiminnik ilanngussaqarsimanerat tupigusuutigivara, Sara Olsvig KNR-imut taama oqarpoq.
AAMMA ATUARUK Danskit partiivisa qineqqusaarutiminni naalagaaffeqatigiinneq ilanngutinngilaat
Dansk Folkeparti kisiartaalluni qineqqusaarutimini naalagaaffeqatigiinnermut, aningaasarsiutigalugu arfanniarnermut silap pissusiatalu ajornartorsiutaaneranut politikkiminik annikitsumik ilanngussaqartuuvoq.
Kalaallit Nunaat paquminartikkaat
SF-ip, Radikalet Vestrellu Kalaallit Nunaannut tunngasunut oqaaseqartartuisa qineqqusaarutinut ilanngussisoqarsimannginnera ajuusaarutigaat, naalagaaffeqatigiinnilu Issittumilu ineriartornerup ulluinnarni politikkikkut ingerlatsinermi annertuumik sammineqareersut erseqqissaatigalugu.
Venstremiilli nassuerutigineqarpoq ilanngussisimannginneq Kalaallit Nunaanni pissutsinik paqumigisaqarnermik pissuteqarsinnaasoq. Taamatulli tunngavilersuisoqarnera Sara Olsvigip naammaginngilaa:
- Soorunami danskit partiivisa akisussaaffeqarfiit kalaallinit akisussaaffigineqartut akuliuffigissanngilaat. Akisussaaffeqarfiilli 32-t innuttaasunut kalaallinut attuumassuteqartut danskinit akisussaaffigineqarlutik Folketingimi suliarineqartartut qimarratigisinnaanngilaat.
Inuit Ataqatigiit nalunaarutigereerpaat, juunip 18-iani qinersinermi isertitaqassagunik danskit partiivinik sorlernik suleqateqassanerlutik maannangaaq aalajangiussaqareersimanatik. Partii kalaallit soqutigisaannik akuersaarnerpaaq taperserniarlugu partiip nalunaarutigaa.
V: Ministereqartitsinissamik piumasaqaat isumaliutigilluartariaqarpoq
Naalagaaffeqatigiinnermut Issittumullu ministereqartitsinissamik piumasaqaateqartoqarnera Venstrep maannangaaq akuerinngikkaa, Claus Hjort Frederiksenip oqaatigaa.
- Isumaliutigeqqissaarneqartariaqarsoraara. Aamma isumaqarpunga naalaaffeqatigiinnermut akisussaaffiup ministeriunermit ministerimut allamut nuunneratigut nukittunerusumik inissisimalertoqassanertoq Kalaallit Nunaata tungaanit isumaliutigineqartariaqartoq.