Naalagaaffeqatigiinni oqartussat maanna eqqissiallassinnaanngorput

Sinerissamik nakkutilliissutip Ejnar Mikkelsenip pingajussaanik misiliinermini Nunatsinni kippasinnerpaatut inissisimasut qeqertat Kitsissut aqqusaarpai. Kitsissut tassaapput qeqertat anginngitsut arfinillit, Pituffimmit 100 kilometerit missaannik kippasinnerusumiittut.

Qeqertat qiterliit ilaanni, qallunaatut Isbjørneø-mik taagorneqartup qatsinnersaani 70 meterit missaannik portussusilimmi kalaallit aamma qallunaat erfalasui amuneqarsimapput. Qeqertat taakku Nunatsinnut taamalu Naalagaaffeqatigiinnut ilaanerat ersersinniarlugu erfalasut tamaani amuneqartarput.

Taamaattorli erfalasut erfalasulerfiillu ukiuunerani silarluttarneranit nungullartarput, taamaattumillu ukiut tamaasa taarserneqartariaqartarlutik. Suliassaq tamanna sinerissamik nakkutilliisunit isumagineqartarpoq.

Ukiormannali suliassap tamatuma isumaginiarnera ajornartorsiutitaqarsimavoq.

Siullermik erfalasuleriartortoqarmat nanorujussuaq qeqertap sissaaniimmat, nanoq eqqissisimatinniarlugu qimaqqiinnarneqarpoq. Aappassaanik misiliinermi qeqertani ussissumik pujormat, pujorneranilu nanoq takkuteriataarsinnaammat erfalasuliinissaq kinguarteqqinneqarpoq.

Sisamanngormat kiisami iluatsinneqarpoq. Silagissisimavoq nannumillu takussaasoqarani. Taamaariarmat sinerissamik nakkutilliissutip inuttaasa erflasulerfiit erfalasullu taarserpaat.

Taamaalilluni naalagaaffiit allat kimmut killeqarfitsinnik arsaarniarsinnaajunnaarpaatigut.