Coronamik ajornartoortitsigaluartoq: Pisortani sulisut soraarsitaanissaminnut ernumassanngillat

Peqqinnissaqarfimmi, atuarfinni pisortanilu allani sulisut, corona pissutigalugu soraarsitaanissartik ernumagissanngilaat.

Aningaasaqarnermut Naalakersuisoq, Vittus Qujaukitsoq (NQ), taamatut oqariartuuteqaroq.

Aamattaaq pisortat kiffartuussinerat ajornartorsiulinnginnermi pissutsinut naleqqiullugu ajornerulissanngitsut, Naalakkersuisut qulakkiissagaat neriorsuutigaa.

- Soraarsitsinissamut imaluunniit innuttaasunik kiffartuussinerit ajornerulernissaannut ernumasoqassanngilaq, KNR-imut Vittus Qujaukitsoq oqarpoq.

Taamaammat napparsimaveqarfimmi sullinneqarnissaq imaluunniit atuartut atuartitaanerata ajornerulernissaannut ernumasoqassanngilaq.

AAMMA ATUARUK Vittus Qujaukitsup soraarnerussutisiassanik katersinngitsoorneq pillugu: Qulaajaasoqassaaq

Naalakkersuisut sapaatip akunnerata uumma allartinnerani nalunaarutigaat, akiliisinnaajunnaarnerit pinngitsoorniassagaanni nunallu aningaasaqarnera illersussagaanni nunanit allaniit 2,5 milliardit koruunit tungaannut atornissaq pisariaqalersinnaassasoq. Tamanna nunarsuatta annersaanni coronamik ajornartorsiornermik peqquteqarpoq.

Politikerit aamma ukioq maanna – ilimanarlunilu aamma 2021-mut aningaasartuutinik ikilisaanissamut periarfissarsiorniarlutik neriorsuipput.

Suliuniutit kinguartinneqassapput taamaatinneqarlutillu

Ilaatigut sanaartugassat Naalakkersuisut qiviarneqassasut, Vittus Qujaukitsup oqatigaa. Tassali Suliassat sorliit kinguartinneqarsinnaanersut sorliillu taamatinneqarsinnaanersut misissorneqassallutik.

Aningaasaqarnermut Naalakkersuisup oqaatigaa suliassat, nunami tamarmi sulisussaqartitsilluarsinnaanerusut salliutinneqassasut.

Vittus Qujaukitsulli KNR-mut suliassat sorliit kinguartinneqarnissaannut imaluunniit taamaatinneqarnissaannut navianartorsiortitaanersut annerusumik eqqaarusunngilaa.

- Tamanna maannakkut oqaatigisinnaanngilara. Oqaatigisinnaasara tassaaginnarpoq aningaasartuutissat pisariaqarluinnanngitsut misissussagatsigit.