Naaja: Air Icelandimut isumaqatigiissut allanngortissiuk

Tamannali aningaasaqarnermut Naalakkersuisumit Palle Christiansenimit, tusaajumaneqanngilaq.

Aningaasaqarnermut Naalakkersuisoq Palle Christiansen demokraatineersup, novemberip ingerlanerani Namminersorlutik Oqartussat Air Icelandilu akunnerminni timmisartuusisarneq pillugu immikkut isumaqatigiissuteqarlutik atsioqatigiipput.

Taassuma kingorna Air Greenlandimit, avammut nalunaarutigineqarpoq, aningaasarpassuit annaanneqartussaannerat peqqutigalugu, nunatta iluani timmisartuussisarneq akitsorneqariaannaasoq.

Tamanna pillugu aningaasaqarnermut ataatsimiititaliami ilaasortat tamarmiullutik, Air Iceland Namminersorlutillu Oqartussat isumaqatigiissuutigisimasaat, unitseqquaat.

- Isumaqanngilanga isumaqatigiissuutaasimasoq, unitsiinnarneqassasoq. Isumaqatigiissutaasoq unitsiinnarneqarpat, tamanna Namminersorlutik Oqartussanut isigineqarnerlunneranik kinguneqassaaq, Aningaasaqarnermut Naalakkersuisoq Palle Christiansen oqarpoq.

Naaja Nathanielsen (IA) ima akissuteqarpoq.

- Sumilluuniit takussutissaqanngilaq aningaasat qanoq amerlatigisut Namminersorlutik Oqartussanut sipaarutaassanersut. Akerlianillu takussutissaqarpoq, isumaqatigiissut nunatsinnut aningaasanik annaasaqaataassasoq, Naaja Nathanielsen oqarpoq.

Januaarimi radioaviisip tusarliutereeraalu Namminersorlutik Oqartussat Air Icelandilu isumaqatigiissusiorsimasut, inuit akerliusut imaaginnavipput. SIK-mit isumaqatigiissusiorsimaneq annertuumik akerlilersorneqarpoq, oqaatigineqarlunilu isumaqatigiissut kalaallinut annertuumik kingunerlussasoq.

- Nassuerutigissavara una isumaqatigiissut politikkikkut aaqqiagiinngissutaammat. Uangali isumaqarpunga, Air Icelandilu isumaqatigiissutigisimasarput ajoquteqanngitsoq, Palle Christiansen oqarpoq.

Tamanna pillugu Naaja Nathanielsen ima akivoq.

- Una isumaqatigiissutaannaavoq!

Imaanngilaq nunarsuaq tamakkerlugu inatsisiliaasoq. Taamaammat ingasattajaarnerusoraara oqassagaanni, una isumaqatigiissut unitsinneqarnerani nunatta isigineqarneranut innarliisuusussatut.

Taamaammat ajornartoqanngilaq, una isumaqatigiissut unitsinneqassappat, uagummi nammineq naalagaavugut, Naaja Nathanielsen oqarpoq.

- Massakkut oqaatigisara, aningaasaqarnermut ataatsimiititaliamullu aamma oqaatigisimasara, tassaavoq isumaqatigiissutiginiakkagut marluusut, aappaat isumaqatigiissutigisimagipput. Taamaalillutalu suliassatta affaa naammassillutigu.

Isumaqarpungalu suliaq naammassereerpat aatsaat nalilerneqarsinnaasoq, Palle Chistiansen oqarpoq.

Naaja Nathanielsen ima naggasiivoq.

- Naammassisimanngikkuniummi naammassitinnagu saqqummiuttussaasimanngikkaluarpaa!