Mylius-Erichsen atuarfimmut atsiunneqarumanngilaq
Ringkøbingip taamatullu Rindumip atuarfiisa kattunneqarnerisa kingorna atuarfiit taakkua ataatsimut ateqalernissaat atuarfiit siulersuisuisa siunnersuutigaat, taakkualu siunnersuutigaat Mylius-Erichsenip atuarfianik ateqassasut.
Ateq Mylius-Erichsenip Atuarfia allassallugu atuartuulluni imaannaanngitsuussaaq, byrådemi venstret sinnerlugit ilaasortaatitaat atermik siunnersuummut itigartitsinerminut tunngavilersuutigaa.
Atuarfik Ringkøbing Skolemik ateqarnissaa kommunalbestyrelsemi aalajangiunneqarpoq.
SF sinnerlugit kommunalbestyrelsemi ilaasortaq kisiartaalluni atuarfiup Mylius-Erichsenimik ateqarnissaanik tapersersuigaluarpoq.
Ludvig Mylius-Erichsen Ringkøbingimi peroriartorpoq, issitumi ilisimasassarsiorluni angalanissaarsuarmi Danmarks-Ekspeditionimi aqutsisuuvoq, 1907-imilu ajunaarluni.
Nuna ajunaarfia tunup avannaarsuaniippoq, tamannalu ateqarpoq Mylius-Erichsen-ip nunaa.
Mylius-Erichsen Ringkøbingimi eqqaasutissiaqarpoq, taamatuttaaq imerniartarfiit ilaat Ringkøbingimiittoq atsiunneqarsimalluni.
