Myanmarimi sakkutuut Aung San Suu Kyi naalakkersuisunik uppisitsinerminni tigusarigaat

Myanmarimi sakkutuut naalakkersuisunik uppisitsinerminnut atatillugu, tamat oqartussaanerat tunngavigalugu nunamik aqutsisutut qinigaasoq Aung San Suu Kyi tigusaraat nunamilu tiguaallutik. Nutaarsiassaqartitsivik AP taama allappoq.

Myanmarimi politikkikkut nuimasut arlaqartut sakkutuunit tigusarineqarput, taakkunannga ilaalluni Myamarip præsidentia.

Inatsisartunut siorna novemberimi qinersinermi peqqusertuliortoqarsimanera peqqutigalugu tigusarineqartoq, sakkutuut nutaarsiassaqartitsivimmut Reutersimut ilisimatitsipput.

AAMMA ATUARUK FN: Rohingyaerit 600.000-t inuartarineqarnissaminnut ulorianartorsiortorujussuusut

Inatsisartut, naalakkersuisut eqqartuussiveqarfiillu tamarmik sakkutuut naalakkersuisunik uppisitsereerneranni atorunnaarsinneqartut, sakkutuullu pissaanermik tigusisimasut, danskit Myanmarkimi aallartitaat John Nielsen oqarpoq.

- Pisunut annilaarpugut. Kialluunniit takorloosimanngilaa taama pisoqassasoq, John NIelsen danskit aallartitaqarfiannit Ritzaumut oqarasuaatikkut oqarpoq.

- Sakkutuut ukiuni 50-ini pissaaneqareerlutik 2011-mi tunuareernerminni pissaaneqaqqilernerat tamat oqartussaaqataanissaannut suliniutigineqalereersumut kinguarsaataasorujussuuvoq, John Nielsen nutaarsiassaqartitsivimmut oqarpoq.

Aung San Suu Kyi-p Myanmarimi innuttaasut sakkutuut pissaanermik tigusinerannut akuersunnginnissaannut partiini aqqutigalugu inappai.