Myanmarimi sakkutuut siorasaarilerput

Kangiata Kujataani, Myanmar-imi – siornatigut Burma-asimasumi – sakkutuut nunamik naalakkersuisuusut – ingerlatsinermik akerliullutik ingerlaateqatigiit, mattuttunit siulersorneqartut siorasaalerpaat.

Nutaarsiassaqartitsivik Reuters nalunaarpoq, sakkutuut qamussui illoqarfiit pingaarnersaanni Yangon-imi buddhistit qinusarfissuata Shwedagon-ip saanut maanna inississimapput. Tassani inuit 100.000-it missaanniittut ippassaq katersuupput. Maannali tassa sakkutuut qamussuit atorlugit siorasaarilerput.

Sakkutuut qamutit højtalerersuallit atorlugit akerliussutsimik takutitsisut qimaguteqquaat, qimagutinngippata saassutissanerarlugit.

Myanmarimi kingullermik akerliussutsimik takutitsisoqarmat 1988-imi sakkutuut saassussineranni inuit 3.000-it sinneqartut toqutaapput.

Franskit nutaarsiassaqartitsiviata AP-p tassataavannguaq nalunaarutigaa katersuussimasut 100.000-inngoqqittut, taakkunanngalu mattuttut 30.000-iusut. Akerliussutsimik takutitsinerit illoqarfinnut arlalinnut maanna siaruaattut aamma oqaatigineqarpoq.

USA-p præsidentia George W. Bush, Naalagaaffiit Peqatigiit qullersaasa ataatsimiinneranni ullumi Myanmarimut iliuuseqarnissat pillugit oqaaseqassangatinneqalereerpoq.