Myanmarimi pisut akeerineqanngitsut nunatsinni inatsisartut naliliiffigissavaat
Demokraatit immikkut ittumik inatsisartut ullumi aalajangigassaannik saqqummiussipput. Tassa Naalakkersuisut qallunaat aamma savalimmiormiut Naalakkersuisui suleqatigalugit Burmami /ullumikkut Myanmarimik ateqartitami sakkutuut kisermaassisutut naalakkersuinerat akuerisinnaanngilluinnarlugu nalunaarutigissallugu peqquneqassasut, taamaaliornikkut inuiaat burmamiut demokratiimik kissaateqarnerat tapersersoqqullugu.
Myanmarimi illoqarfiit pingaarnersaanni Yangonimi sakkutuut kingumut inuit akerliussutsimik takutitsisut tungaannut eqqaassilersut nutaarsiassaqartitsiviit ullaaq nalunaarput. Akerliussutsimik takutitsisut 10.000-it buddhasiortut qinusarfianni katersuussimasut tungaannut eqqaassisoqarpoq. Politiit illoqarfiup ilaa tikitsaaliorlugu aamma assersuilersut nalunaarutigineqarpoq.
Myanmarimi oqartussat nassuerutigaat inuit qulingiluat toqutaasimasut, Australialli Myanmarimi ambassadøria nalunaarpoq, toqutaasut amerlanerujussuusut.
Aamma oqaatigineqarpoq, internettikkut avammut attaveqaatit tamarmik Myanmarimi naalakkersuisut matusimagaat, taamaalilluni nutaarsiassaqartitsiviit avammut tusarliussinissaat ajornarsitinneqarluni. Oqartussat avammut attaveqaatit kipinerat kabelinik ajutoornermik pissuteqarnerarpaat.
