Myanmarimi pissutsit erloqinarsiartuinnarput

Sakkutuut kisermaassillutik naalakkersuisut ikiuiniutinik avataaniit eqqussuinissanut akuersaaraluarlutik ikiuiniaqatigiiffinniit agguaatinniarneqartunik isaaqqusinnginnerat Naalagaaffiit Peqatigiiffiannit sakkortuumik isornartorsiorneqarpoq. Tamat inuussutissaqarnissaannik Naalagaffiit Peqatigiit pilersaarusiortuisa oqaaseqartartuata, naalakkersuisut ikiuiniartunik Myanmarimut iseqqusinnginnerat pillugu oqarpoq, oqaluttuarisaanermi aatsaat taamak pissusilersortoqartoq.

Røde Korsimiilli ikiuiartortitat ilaat nunamut isernissaminnut akuerineqarput. Røde Korsip pisortaa, Anders Ladekarl ullaaq timmisartumik tikittoq oqaluttuarpoq, ullut ingerlatillugit pissutsit erloqinarsiartuinnartut, inuillu 1,2 milliuunit, immaqaluunniit 1,9 milliuunit ajunaarnersuarmit eqqorneqarsimasut, inuillu 65.000 tuusindit, immaqaluunnit 100.000 tuusindit angullugit ajunaarsimassasut ilimagineqartoq. Ikiuiniartulli nunamut siammariartortillugit ajunaarsimasutut naatsorsuutigineqartut amerliartorput. Nunaqarfimmi, illoqarfiit pingaarnersaanniit, Rangoonimiit 100 kilometerisut ungasitsigisumiittumi, inuit angerlarsimaffitik teqqarsimammata mattuffitoqqamut, usseeqisumut qimarngusimapput. Tassani arnaq oqarpoq ullaaq manna nerisassaatitik nunngutaassallugit. Anders Ladekarl oqarpoq ikiuiniutit agguaanneqaleraluartut, manna tikillugu ikiortariallit 10 procentiisa missaannaat annikittuaqqamik ikiorneqarsinnaasimasut, sulilu ikiuutissanik eqqussuiniarneq ajornartorsiornaqisoq.