Muuamaat qaartartortalik aviisit ilanngunniarpaat

Aviisit taamaaliorniarput inuit pingasut titartaasumik, Kurt Westergårdimik toqutsinissamik pilersaaruteqarsimasutut pasillugit PET-p ullaaq tigusarimmagit.

Muamaat pillugu perulluliortoqaqattaalissanerluniaasiit? Syddansk Universitetimi Ph.D, Jakob Feldt, Kangiani Qiterlermi pissutsit pillugit ilisimatusarfimmi adjunktiusoq, aperineqarami tamanna nalileruminaannerarpaa.

Muamaat assilillugu titartakkat takkuteqqaarmata muslimit nunaanni sorsunneqarpoq sulilu ullumikkut pissutsit taamaallutik. Muslimit nunanit killerniit persarineqartutut nikanarsarneqartutullu suli misigisimapput. Maannakkut aviisinit iliuuseriniarneqartut kingullermisuut, soorlu Danmarkip aallartitaqarfiinik ikuallaanernik kinguneqarnissaat ilimanarpianngikkaluarpoq, kisianni nunani assigiinngitsuni maluginiarneqarnissaat ilimanarpoq. Muamaap assinganik titartakkat saqqummeqqaarmata takunninikuunngitsorpassuarnut allaat akerliussutsimik takutitseqataarsimapput, taamaammat imaassinnaavoq maannakkut susoqarneranik ilisimannippianngikkaluartut aamma perulluliornialersut, maannakkulli amerlasoorpassuit nalunavianngilaat inuup ataatsip titartaasimanini pillugu toqunneqarniaraluarnera aviisit inuup taassuma kiffaanngissuseqarnera pillugu taamatut iliuuseqartut, kisianni qanoq kinguneqarnissaata eqqoriarnissaa nalileruminaappoq.