Muuamaamik titartakkunut tunngatillugu saammaasseqatigiinneq anguniarneqarpoq

Muuaamik titartakkanut tunngatillugu saammaasseqatigiinnissamik kissaateqarlutik, atsiornerit 60.136-it ullumi nunanut allanut ministerimut Per Stig Møller-imut nunanilu allanut aallartitaqarfinnut arfineq-marlunnut tunniunneqassapput. Atsiornernik katersuuvoq Jyllandip avannarpasissortaani Nørresundby-mi Ilisimatusarfimmi ilinniartitsisoq Hans Hüttel.

Atsiornerit nittartakkami www.forsoningnu.dk-mi katersorneqarput, atsiortitsinerillu titartakkanut akerliunermik tunngaveqarput, saammaasseqatigiinnissamillu kaammattuisuullutik. Ilisimatusarfimmi ilinniartitsisup aamma Københavnimi aallartitat Bosnien-Hercegovinameersut, Palæstinameersut, Egyptenimeersut, Tyrkiameersut, Algeriameersut, Indonesiameersut Pakistanimeersullu naapissavai, atsiornernillu aamma tunineqassapput.

-Nuannaarutigisorujussuuara taamak amerlatigisut atsiorsimammata. Taassuma takutippaa danskit amerlasoorpassuit kissaatigigaat akerleriinneq torersumik naammassineqassasoq, Hans Hüttel oqarpoq.

Atsiortut danskit naalakkersuisuinut nunallu attuumassuteqartut naalakkersuisuinut kajumissaaripput akerleriinneq ataatsimoorluni qaangerniarneqassasoq.