Nunanut allanut Sillimaniarnermullu Ataatsimiititaliap kiisalu Folketingimi Nunanut allanut tunngatillugu Aalajangiisartoqatigiit Inatsisartut ataatsimiinnera ullaaq ammarneqannginneranni piffissami ataatsikkut ataatsimiipput.

Nunanut allanut naalakkersuisup, Múte B. Egedep (IA) suleqatigiissitat nunatsinnit, USA-mit Danmarkimiillu peqataaffigineqartumi sulinerup killiffia pillugu paasissutissiisoqartoq oqaatigaa.

- Sillimaniarneq nunallu allanut suleqateqarnermut tunngasunik killiffiusunik assigiinngitsunik uani oqaloqatigiinnerit soorunami aamma imaqartarput. Ilisimatitsinerillu USA-p nunatta aamma qallunaat nunaata akornanni oqaloqatigiinnerit suleqatigiissitakkut ingerlanneqartut toqqammavigalugit. 

Killiffimmik qanoq arlaatigut oqaaseqarsinnaavit?

- Killiffiusoq ima oqaatigineqarsinnaavoq, massakkut oqaloqatigiinnerit torersumik aammalu inerititaqarfiusumik ingerlanneqalermata. Aammalu neriuuteqarfigigatsigit oqaloqatigiinnerit taamatut toqqammavilimmik ingerlalernerat aallaavigalugu aamma angusaqariartuaartoqarsinnaasoq qanittumi.

Inerititaqarfiunerusumik oqaloqatigiittoqartoq

Múte B. Egedep oqaloqatigiinnerit inerititaqarfiunerusumik ingerlanneqalersimasut ilanngullugu oqaatigaa.

- Piffissami sivisuumi tassaniinnikuunngilagut, massakkut piffissami kingullermi ingerlajartuaarpugut. 

Taamaammat isumaqatigiissuteqartoqarsinnaanissaa aamma neriuutigaa.

- Naalakkersuisullu isumaqarpugut massakkut oqaloqatigiinnerit toqqammaviat ingerlanneqaannarsinnaappat neriuutissaqartugut naammassisaqarsinnaassalluta aammalu taamaalilluta isumalluarsinnaassalluta suliap uuma piffissami sivitsortumi tamatsinnut sunniuteqarsimasup aamma naammassineqarsinnaanissaanut. 

Mianersortumik neriuuteqartoq

Danskit nunanut allanut ministeriata, Lars Løkke Rasmussenip (Moderaterne) USA-mut isumaqatigiissuteqartoqarsinnaanissaa 'mianersortumik neriuuteqarfigalugu' oqaatigeqqammerpaa.

Múte B. Egede assingusumik aamma oqaaseqarpoq. 

- Oqaatigivara neriuuteqaleqqavugut massakkut. Soorunami mianersortumik.