Múte B. Egede: Nunarput Danmarkilu Trump pillugu mianersortupilussuupput

USA-p præsidentiata Donald Trumpip Kalaallit Nunaannik aqutserusunnini ilumoorukkaa, Kalaallit Nunaanni Danmarkimilu siusinnerusukkut paasineqarsimasinnaagaluarpoq.

Naalakkersuisuni siulittaasuusimasoq Múte B. Egede (IA) TV 2-mut taama oqarpoq.

- Immaqa uppertikkuminarpallaarsimavugut. Mianersortupilussuusimavugut. Nunatsinniinnaanngitsoq Danmarkimiinnaanngitsumilu, killernili tamani. Immaqa allatut iliuuseqartoqarsimasinnaagaluarpoq, Múte B. Egede oqarpoq, taannalu ullumikkut aningaasaqarnermut akileraartarnermullu naalakkersuisuuvoq.

Allatut iliuuseqarsimasuugaanni tamatuma qanoq malitseqarsimasinnaanera pillugu aperineqarami, tamanna ataqqinninnermik malitseqarsimasinnaassagaluartoq akivoq. TV 2 taama allaaserinnippoq.

Donald Trump USA-mi 2025-p aallartinnerani præsidentinngormalli, USA-p Kalaallit Nunaannik aqutsinerulernissaanik kissaateqarnera arlaleriarluni sammineqarpoq.

USA-p Kalaallit Nunaat isumannaallisaanermut tunngasut pissutigalugit pisariaqartikkaa, USA-p præsidentiata oqaatigisarpaa. Nunarpullu præsidentiuffimmi siulliup nalaani pisiariumavaa.

Donald Trumpip Natop qullersaa Mark Rutte, Kalaallit Nunaat Issittorlu pillugit killiliussatut isumaqatigiissuteqarfigisimallugu januaarimi nalunaarutigaa. Trumpip qeqertaq piffissami sivitsortumi tiguarusullugu kissaateqareersorlu tamanna pivoq.

Trumpilli Ruttellu isumaqatigiissutaat pillugu paasissutissat sukumiinerusut suli saqqummiunneqanngillat.

Inuttaasunut sunniuteqartoq

Danmark, USA aamma Kalaallit Nunaat tamatuma saniatigut suleqatigiissitaliornissamik isumaqatigiissuteqarput, taakkualu aaqqiissutissaq oqaloqatigiissutigissavaat. 

Múte B. Egedep taartimi Jens-Frederik Nielsenip pissutsinik qanoq iliuuseqarfiginnissimaneranik tapersersuilluni, TV 2-mit apersorneqarnermini erseqqissarpaa.

Kalaallit Nunaannut tunngatillugu eqqissiviilliortitsinerit inuiaqatigiinnut sunniuteqangaarsimasut, naalakkersuisunut siulittaasuusimasup tusagassiuutinut oqaluttuaraa.

/ritzau/