Tom Dans mikrofonip ikumanerani: “The check is in the mail”
Folketingimut ilaasortap Aaja Chemnitzip (IA) Amerikamiullu niuerniartarfiutillip Tom Dansip naapinneranni mikrofoni ikumaannarsimammat, oqaluunnerat nutaarsiassakkoorunneqarpoq.
Tamanna taakkua NRK-p aallakaatitaannut Nyhetsmorgen-imut peqataanerannut atatillugu immiussisarfimmi marlunngornermi pivoq. Dansip apersorneqareerluni immiussisarfimmit anilernerani, Aaja Chemnitzillu apersorneqariartorluni takunnerani, oqaluunnerat mikrofonikkut ikumaannartukkut tusaaneqarsinnaasimavoq.
Dans tassani oqarpallappoq: ‘The check is in the mail’ (checki allakkatigut nassiunneqareerpoq, aaqq.).
Taamatut oqarneq Aaja Chemnitzimit iluarineqanngilaq.
- Kalaallinut nikaginnippalaartumik oqalunneq suli atuuppoq. Kalaallit Nunaata ajornartorsiutaanni annerpaartaagunarlutik, Kalaallit Nunaata ajornartorsiutaannik aaqqiumaarnermik oqalunnerat (USA-p, aaqq.) suli qaangiutinngilaq, Aaja Chemnitz oqarpoq.
'Soqutiginninngitsoq’
Aaja Chemnitz aamma Tom Dans ataatsimeersuarnermut Arctic Frontiers-imut peqataajartorlutik Tromsømiipput. Tom Dans USA-mi Issittumi Ilisimatusarnermut Ataatsimiititaliarsuarmi siulittaasuuvoq, taannalu præsidentimut kongressimullu Issittoq pillugu siunnersuisuuvoq. Donald Trumpimit atorfinitsinneqarpoq.
Norgemi tusagassiorfiup NRK-p tusagassiinera naapertorlugu, Dansip taamatut periarfissinneqarnini iluatsillugu, Kalaallit Nunaat danskinit aqunneqartutut killilersorneqartutullu oqaatigaa.
- Kalaallit nunamik aqutsisuunngillat, danskit innuttaasui aqutsisuupput, Tom Dans NRK naapertorlugu oqarpoq nangillunilu:
- Nunarsuarmili aningaasaaqarnerup tungaatigut pisuujunerpaaq angullu pissaaneqarnerpaaq (Præsident Trump, aaqq.) tapersersortigitillugit, ajunngitsunik pisoqarsinnaavoq - ajunngitsunillu pisoqassaaq.
Aaja Chemnitzip Dans apersorneqareerluni immiussisarfimmit anillakkami sanioqqulluni assani isaassimagaa, KNR-imut oqaluttuaraa.
Aaja Chemnitzilu oqarpoq 'not interested' (soqutiginninngilanga, aaqq.), angullu akivoq, 'The check is in the mail' (checki allakkatigut nassiunneqareerpoq, aaqq.)
- Taava akivara ‘still not interested, we are not as capitalistic as you are’ (Suli soqutiginninngilanga, ilissitulli aningaasartiginngilagut, aaqq.) oqarfigaaralu kalaaliusugut salluliuutigiunnaassagaatigut, taanna oqarpoq.
Suli ernumasoq
Aaja Chemnitzip oqarnera naapertorlugu, Dansimik naapitaqarnerup, kalaallit politikeriisa USA-mik akerleriissuteqarujussuarnermi, naak nunatta, USA-p Danmarkillu akornanni suleqatigiissitanik pilersitsisoqareeraluartoq, suli qasukkarsinnaannginnerannik ersersitsivoq.
- Mikrofonip ikumanerani - isumaqarpungalu taassumap (Dans, aaqq.) kukkussutigisimassagaa - imatut oqarsinnaagaanni 'checki nassiunneqareerpoq', Vancellu (USA-mi præsidentip tullersortaa) USA-mi tv-kkut aallakaatitat isiginnaartoqarnerpaaffiata nalaanni, Kalaallit Nunaanneersut Danmarkimeersullu illaatigisinnaappagit, Jeff Landrylu (immikkut aallartitaq) uanga isumanni, ingasattajaarluni suli oqaaseqartoq takugaangatsigu, taava ajornartorsiuteqarpugut, taanna oqarpoq.
KNR-ip Tom Dansip taamatut oqaaseqarnermini suna siunertarineraa paaserusullugu, apersorniaraluarpaa, piffissaliussalli qaangiutinnginnerani tamanna ajornarsimavoq.
