Musicalimik piginnaasallik piumaneqartut
Aasaaneranimi musicalimut peqataasinnaanissamut misilitsittoqarsinnaassaaq, inuusuttut aqqaneq-marluk 25-llu akornanni ukiullit misilitsissinnaallutik. 19-it maannamut nalunaarsimapput, sulilu inissaqarluni.
Isiginnaartitsinermik misilittaqarsimanissaq piumasaqaataanngilaq, isiginnaartitserusussuseqarnissarli piumasaqaataaginnarluni. Aaqqissuisut KNR-imut taama ilisimatitsipput.
- Piumassuseqartariaqarputit, isiginnaartitsinermik soqutigisaqassallutit, erinarsornermillu isiginnaartitsinermillu nuannarisaqassallutit, Ane Marie Ottosen, isiginnaartitsisartutut naammasseqqammersoq, misilitsinnermilu naliliisartussat ilaat taama oqarpoq.
Naliliisartussat marluk allat tassaassapput Arnaq Lynge, Kommuneqarfik Sermersuumeersoq aamma Rasmine Geisler, NUIF-imeersoq. NUIF musicalimik aningaasaleeqataasunut ilaavoq.
Misilitsinnermit toqqarneqartut 15-it Qoornumi sungiusarnermut, tassa bootcampimut, peqataassapput. Qoornumilu sungiusartoqareerpat ilitsersuisoqareerpallu tamanna isiginnaartitsinermik naammassineqassalluni.
Misilitsinnissamut soqtiginnittut NUIF-imut saaffiginnissinnaapput.