Mullah Obaidullah Akhund tigusarineqarpoq

Talebanit siuttuisa ilaat, ujaarineqarnerpaallu ilaat siornatigut illersornissamut ministeriusimasoq Mullah Obaidullah Akhund, Pakistanimi illoqarfiit ilaanni sakkutuunit isumannaallissaanissamik suliaqartunit tigusarineqarsimavoq. Pakistanimi naalakkersuisuniit taama nalunaaruteqartoqarpoq. Nalunaarullu talebaninit uppernarsarneqarpoq.

Mullah talebaninut ilaasortat allat sisamat peqatigalugit ataasinngormat unnukkut tigusarineqarpoq.

Tigusarinninneq pivoq USA-p præsidentiata tulliata Dick Cheney-p tupaallaatigineqartumik Pakistanip præsidentianut, Pervez Musharraf-imut tikeraarneranit nalunaaquttap akunnialunngui qaangiutiinnartut.

Cheney-p tikeraarnermini Pakistanip talebaninut aamma Al Qaida-mut ilaasunut peqqarniisaarnianut iliuuseqanngippallaarnera naammagittaalliuutigaa. Taakkuami 2001-imili uppisinneqarnermi kingornagut Pakistani aallaavigimmassuk.

- Tamanna iluatsitsinerujussuuvoq talebaninullu kinguariarnerussalluni. Tassami Akhund siuttunut qullerpaanut ilaavoq, Islamabad-imi atorfillit ilaat oqarpoq.

Afghanistanip kujataani talebanit nunani allamiut sakkutuuinut saassussisarneranni pingaarutilimmik inissisimasuusoq aamma oqaatigineqarpoq.

Mullah Obaidullah Akhund-ip tigusarineqarnissaanut paasissutissiisinnaasunut USA 1 million dollarsinik akiliiumalluni nalunaaruteqareernikuuvoq.