Mugabep partiia amerlanerussutaaruppoq
Zimbabwep præsidentiata, Robert Mugabep partiiata Zimbabwemi inatsisartuni amerlanerussuteqarnini annaavaa.
Allattoq Elisa Isaksen
Kisitsisit qinersinermut ataatsimiititaliap pisortatigoortumik avammut saqqummiussai taama ersersitsipput.
Qinersinermut ataatsimiititaliap nalunaarutigaa illuatungiliuttut partiiata MDC-p inatsisartuni inissat 105-it pissarsiarigai, Mugabellu partiiata Zanu-PF-ip inatsisartuni inissat 93-it pissarsiarigai.
Zimbabwemi inatsisartunut qinersineq præsidentimut qinersinermut ilanngullugu arfininngormat ingerlanneqarpoq. Præsidentimut qinigassanngortillutik Robert Mugabe aamma illuatungiliuttut siuttuat Tsvangirai.
Præsidentimut qinersinerup inernera qinersinermut ataatsimiititaliap suli avammut saqqummiutinngilaa.