Mubarakip tunuarneragut najummassimaartoqalerput

Pisortat taakku eqqartuussivinnut sassartinneqarnissat, naalakkersuisuni illuatungiliuttut ullumi piumasaraat. Pisortat pasineqarput akilersillutik peqquserlussimasutut, nunamilu pissutsit aaqqippata taamaaliorsimanertik parnaarussaassutigisinnaagaat oqaatigineqarpoq.

Aningaasarsiornermik suliaqartut nuimasut aamma ministeriusimasut arlallit qangatsiarli nunamiit aallaqqusaajunnaareerput.

Egyptenimi aaqqiangiinnginnerit nalaanni Cairomi parnaarussivimmit parnaarussat 600-t qimarrassimapput, taamaaliornerulli nalaani inuppassuit toqutaasimapput ikilerneqarlutilluunniit.

Parnaarussat qimarranneranni isiginnittut oqaatigaat, inuit parnaarussiviup tungaanut aallaasinik eqqaassisimasut.

Aaqqiangiinnerit nalaanni parnaarussivinni aappassaa perulluliortoqarpoq qimarrannermik kinguneqartumik.

Tamakku peqatigisaanik Egyptenimi sakkutuut ullumi nalunaarutigaat, nunami immikkoortortani aamma nunanut allanut isumaqatigiissutit Egyptenimit malinneqassasut.

Taamatut nalunaaruteqarnerup toqqaannanngikkaluartumik ersersippaa, eqqissinissaq pillugu Israelimut isumaqatigiissut ajoquserneqarsimanani attuuttoq.

- Egyptenip isumaqatigiissutai aalajangersakkat nunami immikkoortortanut aamma nunanut allanut atuuttut tamaasa malinniarpai, Sakkutuut sakkuaattartut qulersaasa siunnersuisoqatigiivi TV-kkut taama nalunaaruteqarput.

1979-mi Egyptenip aamma Israelip eqqisseqatigiinnissaq pillugu isumaqatigiissutaat, Hosni Mubarakip præsidentiujunnaarnera qularnaveequsiullugu naqissuserneqarpoq.

Egyptenimi aaqqiagiinnginnerit Israelimit toqqissisimanngissutaaleraluarput, tassami Egyptenimi oqartussanngortussat nutaanit isumaqatigiissutit atortinneqanngitsuussagaluarpata nunap Israelip ulorianartorsiorsinnaanera pillugu.

Egyptenimi sakkututuut nalunaajaataanni allassimavoq, maanna naalakkersuisuusut, Mubarakip naalakkersuisuujunnaanngilaattaani ivertinneqartut ingerlaannarallassasut, naalakkersuisut nutaat ivertinneqarnissaasa tungaanut.

Aamma nalunaajaammi allassimavoq, inuinnaat qinigaannik naalakkersuisunngortitsinissap tungaanut eqqissimasumik ikaarsaariartoqarnissaa sakkutuut neriorsuutigigaat.