Mubarak partiimi siulittaasutut tunuarpoq

Igitsinimi naalagaaffiup tv-qarfia taama ilisimatitsinerarlugu nutaarsiassaqartitsivik AP nalunaaruteqarpoq. Mubarakip partiiani siuttut tamarmik tunuarput. Taakkununnga ilaalluni præsidentip ernera Gamal Mubarak.

Taamaattorli Hosni Mubarakip præsidentitut tunuarniarneranik nalunaaruteqartoqanngilaq.

Præsident Mubarak septembarimi præsidentimut qinersisoqalerpat qinigassanngorteqqinniarani, sapaatip akunnerani matumani siusinnerusukkut neriorsuivoq. Kisianni Kairop qiterpasinnerusortaani Tahririp Illoqannginnersaani, akerliussutsimik takutitsisorpassuarnut qitiusumik inissisimasumi, præsidentip piaartumik tunuarnissaa piumasarineqarpoq.

Igitsinimi sakkutuut qullersaat Tahririp Illoqannginersaanut ullumi siusinnerusukkut takkuppoq.

Taanna akerliussutsimik takutitsisut angerlakaaqqullugit kajumissaarivoq, kisiannili akerliussutsimik takutitsisut oqaasinnaatik, ulluni kingullerni aqqaneq marlunni suaartaatigiuakkatik suaartaatigiuarsinnarpaat.

Inuppassuit katersuussimasut angerlakaarusunngillat. Taakku Mubarakip præsidentitut tunuarnissaa suli piumasariuarsinnarpaat.