M/S Framip angallassisarnini ikilivai

Norskit umiarsuaatileqatigiiffiata umiarsuaataat Framip 2010-mi 2011-milu Kalaallit Nunaata imartaani angallassinissani affaannanngortinnialerpai.

Takornariutip pilersaarutai naapertorlugit Qeqertarsuup Tunuani angallassinerit pingasut aappaagumut pilersaarutigineqarput. Ukiormanna angallassinerit aqqaneq-marluugaluartut.

Frammi ukiormanna marloriarluni Qaanaaliarpoq, aappaaguli ataasiaannarluni Qaanaaliassalluni.

-Naak Qeqertarsuup tunuani ukiormanna angallassinerit amerleriarsimagaluarlutigit, takornarianik Kalaallit Nunaata imartaani angalarusuttunik pissarsiniarneq ajornakusoornerusimavoq, Frammip Kalaallit Nunaanni angallassineranut pilersaarusiortartoq, Ida Lund Winther oqarpoq nangillunilu:

Qeqertarsuup Tunuani angallassinermut atatillugu akit apparneqarneratigut takornariat amerlanerusimapput.

Nunarsuarmi aningaasarsiornikkut ajornartorsiorneq takornarialerisuni tamani sunniuteqarnerluppoq soorluttaaq umiarsuarmik attartorluni svalbardimut takornariartartut ikilisimasut, taamaattumik Kalaallit Nunaannut Svalbardimullu angallassisarnerit ikilisariaqarpavut, Frammip Kalaallit Nunaanni angallassineranut pilersaarusiortartoq, Ida Lund Winther nassiuaavoq.

Taamaattoq Islandip tunullu akornanni angallassinerit amerlineqassapput, aammattaaq Svalbardimut angallassinerit aappaagu junip julillu qaammataanni pilersaarutigineqarput.