Mozartip erinniarsua taamaatinneqarpoq

Tysklandimi erinniarsuarnik tusarnaartitsisarfissuup ataqqisaasup Mozartip erinniarsua ukiunik 225-inik pisoqaassusilik tusarnaartitsinermit peersimammagu Tysklandimi oqallisaalerpoq.

Tusarnaartitsinermi profetip Muuamaap niaqua timaanit peerneqarsimasoq ilaasussaammat tusarnaartitsivissuarmi pisortap muuamaamik upperisallit qisuariarnissaat annilaanngatigaa.

Muuamaap, Jiisusip, Buddhap grækerillu upperisaasa Poseidonip niaqui aagasattut tusarnaartitsinerup nalaani issiavimmi novembarimi tusarnaartitsisoqalerpat takuneqarsinnaasussaagaluarput.

Tusarnaartitsivissuarmili pisortap ullutsinni pissutsit eqqarsaatigalugit tusarnaartitsinissaq navianarpallaassatippaa Muuamaamimmi upperisallit malittarisassaanni allassimavoq Muuamaat mitaatigalugu kinaluunniit saqqummiissanngitsoq.

- Taanna takutinneqassagaluarpat tusarnaariat sulisullu navianartorsiortinneqarsinnaapput. Inuit toqqissisimatinneqarnissaat angorusullugu taama aalajangerpunga, tusarnaartitsivissuarmi pisortaq oqarpoq.

Taamatut oqarnermini ilanngullugu kinaassutsiminik isertuussisunit qunusaarneqarsimallutik nalunaarutigaa. Berlinimi politiit tusarnaartitsinerup takutinneqarnerata kingunerisaanik inuit inuunerinik naleqarsinnaasoq mianersoqqusereerput.

Inuit Muuamaamik upperisallit upperisaminnik malinneqqissaarniat pillugit naalakkersuinermik suliaqartut unitsitsinerup kingorna oqallisilerput.

Peqqarniiserfigineqarnissamik annilaanganeq Tysklandimi kanslerip ajugaaqqunngikkaluaqaa. Tysklandimi pissutsinut ministerip aalajangerneq akuersaarneqarsinnaannginnerarpaa.

Tyrkerit Tysklandimi nunasisut kattuffiani siulittaasup unitsitsineq ajuusaarutigaa, oqarluni, muuamaamik upperisallit matumani ajuusaarnartumik ajugaatinneqartut.

- Paavip qanittukkut issuaalluni oqarnermini muuamaamik upperisallit kamaammertereerai, isiginnaagassiaq kamaammiunneqarsinnaasoq takutissallugu uagut tulluartuutinngilarput, tusarnaartitsivissuarmi pisortaq oqarpoq.

Tysklandimi muuamaamik upperisallit siunnersuisooqatigiiffianni siuttut ilaata tamanna isumaqatigaa.