Mount Redoubt uuliaasivimmik navianartorsiortitsivoq
Innermik anitsinerit amerlasuut uuliaasivik 22 millionit literinik imalik ernumanartorsiortileraa, aviisi Politikken allappoq.
Innermik anitsisartoq Alaskap kujataatungaani illoqarfissuarmit Anchoragemit 160 km-erisut ungasitsigisumiippoq. Arsakunit putsut annertuut avannamukaarput, ilaatigut illoqarfiup Talkeetnap kiisalu USA-mi qaqqat portunersaata Mount McKinleyp tungaanut ingerlaarlutik.
Innermik anitsisartup kuussuaq Drift River annertuumik qarsutsisippaa, maannalu qarsutsinerup sapusiat uuliaasivissuup illersuutaasa aserornissaat ernumanartoqartilerpaa.
- Sapusiat sananeqarnerat ernummatigineruarput. Sapusiaq nunamit sanaaq kuummit aqqusaarneqaruni silap qanoq innera sapusianullu mangiaaneq kisimik apeqqutaalissapput, taama oqarpoq sinerissamik nakkutilliisoq Joseph Losciuto Anchorage Daily Newsimut.
Alaska Volcano Observatory-mit sermit tamaaniittut aatsinneqarsinnaanerat ippassaq aarlerisaarutigineqarpoq, qaqqap innermik anitsisartup qaammaterpaalunni anitsinissaa ilimanaateqarmat. Avatangiisinut illersuiniarnermi kattuffissuup Cook Inletkeeperip maanna piumasaraa uulia suliarineqanngitsoq isumannaatsumut assartorneqassasoq, mingutsitsisoqannginnissaa anguniarlugu.