Motoripiluunersuaq Nuup iluani unnugu assartorneqassaaq
Motorerujussuarlu 358 tonsinik oqimaassuseqarpoq, fem meterit sinnerlugit silitsigaluni seks meterillu angungajallugit portutigaluni, inissiarsuarni init quleriit marluk portoqqatigaa. Motoori angingaarmat, immikkut ittumik angallanneqassaaq, angallassissutigineqassallunilu kalittaatsiusarujussuaq 90 tonsimik oqimaassusilik.
Motori generatorersuaq unnugu angallanneqassaaq, angallanneqarnissaanullu aqqusinermi asfalti qalleqqinneqarsimavoq aammalu aqqutissaani aqquserngup qullii ledningillu piiarneqarsimallutik.
Angallanneqarnissaali ajornaattuinnaanavianngitsoq Blue Water Greenlandip pisortaanit Ole Bøgh Ulrichsenimit oqaatigineqarpoq.
- Motoorersuup isumannaatsumik angallanneqarnissaa isumagaarput. Politiinullu aamma qinnuteqarsimalluta motoorip aqqusinikkut angallanneqarnissaanut. Aamma ilimagaarput, politiit isumannaallisaaneq pillugu, aqqusinermi paarsisuujumaartut. Imaanngitsoq, motoori sukkasuumik angallanneqassammat inunnut ulorianartoq, taamaattoqanngilarli, isumannaatsumiguna motoori angallanneqarnissaa anguniarneqartoq, Ole Bøgh Ulrichsen oqarpoq.
Motoorerujussuaq 358 tonsimik oqimaassuseqartoq, juulip 15-niani Triestemut Italiamiittumut aaneqarsimavoq, unnugulu tassa apuuffissaminut ingerlanneqassalluni. Ilimagineqarpoq aqqusinikkut ingerlannera minnerpaamik tiiminik marlunnik sivisussuseqassasoq.
