Norgemi aallaasersorneq peqqarniisaarnerusoq
Angutip pineqartup illersuisua Norskit nutaarsiassaqartitsivianut NTB-mut sapaammi unnukkut taama oqarpoq.
Angut 21-nik ukiulik ullummi inatsit tunngaviusoq naapertorlugu killisiorneqassaaq.
- Eqqartuussivimmut takkutissaaq, kisianni nassuiaateqarumanngilaq, pineqartoq tiimini arlalinni illersuisuata oqaloqatigereerlugu taama oqarpoq.
Arfininngornermi peqqarniisaarluni aallaasersortoqarnera maanna Norskit politiivisa misissuiffigileruttorpaat.
Politiit naapertorlugit 21-nik ukiulik aallaasersormat toqutaasoqanngilaq, kisianni qatanngutisiaminik 17-inik ukiulimmik toqutsisimasutut unnerluunneqarpoq. Angutip qatanngutisiaa angutip najugaqarfigisaani Bærumimi toqungasoq nassaarineqarpoq.
Angut 21-nik ukiulik Norgemeersuuvoq norskisullu innuttaassuseqarluni.
Politiilli nassuiaanerat naapertorlugu angut nittartakkatigut sakkortuunik isummersuuteqartarpoq.
