Moses Olses isumaqataanngilluinnarpoq

Sermitsiami ullumi saqqummersumi ilaatigut atuarneqarsinnaavoq Moses Olsenip, partiimik Siumumik pilersitseqataasup, politikkissaanillu isumaliortarsimasup, naalakkersuisut siulittaasuanik Hans Enoksenip departementchefinik kalaaliinnarnik kalaallisullu oqalussinnaasuinnarnik atorfinitsitsiniarnerani isumaqatiginninngilluinnarnerminik oqaaseqaataa.

Naalakkersuisullu saqqummiussaat assigiinngitsut tupigusuutigai.

– Naalakkersuisut kalaallinik departementschefilersorniarput, soraarsitsiumannginnerarlutilli. Allaffissornerlu pisariillisaaviginiarlugu. Tamakku imminnut ataqatigiinngillat, Moses Olsen oqarpoq.

Departementschefinngortussallu sunik pisinnaasaqarnissaat paaserusuppaa. Kalaallit taamatut piginnaanillit amerlannginnerarpai.

– Imaanngilaq kalaaliunertik pissutigiinnarlugu allaffissorluni aqutsinermik paasisimasaqaqqissaartuussasut. Ilinniarsimassutsikkut pisinnaasat tunngavigalugit atorfinitsitsisassannginnatta? - Moses Olsen aperivoq.

Tamannalu Sermitsiami ullumi saqqummersumi atuarneqarsinnaavoq.