Moses Olsen suleqatigisimasaminit eqqaaniarneqarpoq
Stephen Heilmann ima eqqaaniaavoq:
------------------------------------------------
Moses Olsen, Moorsisi, Aqqalunnguaq, Utoqqaq, akornatsinniikkunnaarpoq, nappaammit qaangersinnaanngisaminit nalaanneqarluni. Namminersornerulernerup ataataasa ilaat qimaguppoq!
Toquneranik kalerrinneqarama ukiuni 53-ini ilisarisimanerani ilaatigut peqatigiilluta aqqusaartarsimasavut sarsuapput.
Moorsisi Sisimiuni inunngorpoq 1938-mi, Nuummilu realskolimi 1959-imi soraarummeereerluni Østre Borgerdydsskolimi 1962-imi ilinniarnertuunngorpoq, Islandillu Universitetiani islandimiut oqaasii, atuakkiaat oqaluttuarisaanerallu ilisimatusarfigalugit. Kingorna nutserisutut soraarummeerpoq, Kalaallit Nunaannullu ministereqarfimmi sulisinnarluni Knud Rasmussenip Højskoliani 1970-imi ilinniartitsisunngorpoq, kingusinnerusukkullu Aalisartut Piniartullu Kattuffiata allaffeqarfiani pisortaalluni.
Moorsisi 1971-imiit 73-imut Folketingimut ilaasortaavoq, Partiimik Siumumik aallartitseqataalluni, 1979-imilu namminersorneruleratta inatsisartunut naalakkersuisunullu ilaasortanngorluni. Assigiinngitsunik akisussaaffeqartarluni 1991-ip tungaanut naalakkersuisunut ilaasortaavoq.
Moses Olsen inuusuttuaraallunili taalliornermik soqutigisaqartuuvoq, taalliaminilu qitiutikkajutai tassaapput nunani, ilaquttani inuunerlu.
Moorsisimillu eqqaaniaalaarnera taalliaasa ilaannik naggasissallugu tulluartuusoraara:
Maani inuunera
erniinnaq naajumaarmat aamma.
Ullut pingaarfikka
killissaqarmatami aamma,
oqarlanga kisinnanga:
Suliama sikkersui
takukkit inerittui –
uanga tassa!
Moses Olsenip eqqaaneqarnera ataqqinartuuli!
Moses Olsenip qimatarai nulii Elisa, panini ernuttanilu.
Moses Olsen-ip ullumi toqunera Inatsisartut ataatsimiittarfianni minutsimi ataatsimi nipaallisimalluni aamma eqqaaniarneqarpoq.
Taanna pitinnagu ikinngutaa ukiorpassuarnilu naalakkersuinikkut suleqataa, naalakkersuisut Inatsisartullu siulittaasorisimasaat, Jonathan Motzfeldt, eqqaaniaalluni oqaaseqarpoq.
Moses Olsen, Lars-Emil Johansen Jonathan Motzfeldt-ilu partiimik Siumumik pilersitsisuupput,
