Morten Rutkjær: Nunanut allanut unammisartut aatsaat taama unammersuaartigilerput
Angutit inersimasut isikkamik arsaattartut Ilulissani pissanganartumik pissartanngorniutereersullu nunanut allanut unammisartut arfinilinnik nutaartaqalerput.
Nunanut allanut unammisartut septembarimi nunanut allanut unammiaqatigeeqqaarunik Europami isikkamik arsaattartut pikkorinnerpaat ilaannik unammisaqassapput.
Isikkamik arsaallutik nunanut allanut unammisartutut toqqakkat:
Brian Rosing Kleist
Peter Berthelsen
Aiko Elgård Nielsen
Kunuuteerak Isaksen
Katu Madsen
Morten Fleischer
Adam Ejler Hansen
Morten Nystrup
Mika Thyssen
Rene Eriksen Petersen
Mathias Mac Christensen
Nikki Petersen
Niels Erik Eriksen
Ari Hermann
Karsten Møller Andersen
John Ludvig Broberg
Søren Kristiansen
Nemo Thomsen
Søren Kreutzmann
Hans Karl Berthelsen
Nunatta isikkamik arsaattartuisa nunanut allanut unammisartut Tyrkiamut septembarimi sungiusaatigalugu unammeqataanissaminni nunat allat sisamat unammisartui mannalu tikillugu unamisarsimasaminni arsallaqqinnerpaat naapissavaat.
- Kosovomiut, Europami pissartanngorniuteqataasussat unamminissaannut periarfissaqalerpugut. Taakkua kalaallit manna tikillugu unammisassaanni arsallaqqinnersaapput. Unammillernangaatsiassapput, unammisartuttali taakkutut pikkoritsigisunik unammisaqartarnissaat sulissutigaarput.
AAMMA ATUARUK Arsaannermi GM-mi arsallammanngortoq: Toqqarneqarneq tupaallaatigeqaara
Kalaallit Tyrkiamiinnerminni Kosovumiut saniatigut Kasakstaniut U19-ii kiisalu Burindip Turkministanillu nunanut allanut unammisartui aamma unammissavaat.
- Kalaallit nunanut allanut qanoq unammisarnissartik imminnullu ilikkkarnissartik ilinniassavaat ilisarisamasartaartussallutillu, Morten Rutkjær oqarpoq.
- Kosovomiut Europami arsallammassuit unammilerutsigit tamaviiaassaagut, kalaallit unammisartuisa pikkorissutsimikkut sumut killissimanerat takuniarlugu.
GM-ertoqarnerani nunanut allanut unammisartut nassaarineqartut
Nunanut allanut unammisartut sungiusaasuat Morten Rutkjær, Ilulissani pissartanngorniunnermut malinnaanermini, nunanut allanut unammisartut katillugit 20-iusussat ilassaannik arfinilinnik nassaarpoq.
- Arsaattartut katersuunnitik tamaasa pitsanngoriaateqarsimasarput. Kalaallit arsallaqqissiartuinnarnerat takullugu nuannaajallannanngitsuunngilaq, Morten Rutkjær oqarpoq.
- Ukiut marluk ingerlanerinnaanni siuariarujussuarsimapput aallartilaaginnarpugullumi. Ukiuni tulliuttuni tallimani taamaaginnassagunik qanoq angusaqarumaarnissaat pissanganarpoq.
Nunatsinni angutit inersimasut isikkamik arsaattartut nunanut allanut unammisartui Tyrkiamiissapput septembarip 17-ianniit 25-ata tungaanut.
