Moriusap siunissaa nalunarpoq

Qaanaap kujataani nunaqarfik Moriusaq qanoq siunissaqassanersoq pillugu Naalakkersuisut inassuteqaatissaat Naalakkersuisut sisamanngorpat tulliani oqaluuserisassaasa ilagigaat, Ineqarnermut, Attaveqarnermut Angallannermullu Naalakkersuisoq, Jens B. Frederiksen (D) oqarpoq.
Allattoq Jørgen Semionsen
juulip 30-at 2009 10:35

Moriusaq ullumikkut marluinnarnik inoqartoq Qaasuitsup Kommuneani borgmesterip aamma Naalakkersuisup piffissami sivitsulersumi eqqartoqatigiissutigisarpaat.

-Ilumoorpoq nunaqarfiup Moriusap siunissaa pillugu Ineqarnermut, Attaveqarnermut, Angallannermullu Naalakkersuisoq Jens B. Frederiksenilu nalilersueqatigalugu arlaleriaqaluta oqaloqatigiittaratta, Qaasuitsup Kommuneani borgmesteri Jess Svane (S) Radioaviisimut oqarpoq.

Alianartumik toqutsinermik qanittukkut pisoqarneratigut Moriusami innuttaasutut nalunaarsorsimasut sisamannngorput.

Nunaqarfeeqqamilu tassani innuttaasut marluk qangalili Qaanaami najugaqalersimammata Moriusarmiut massakkut marluinnaasut oqaatigineqarpoq.

-Moriusaq matussanersoq arlaleriarluta oqaluuserisarparput - nalilersuinerit, kisitsisit, aningaasartuutit allallu oqaluuserisarlugit, Ineqarnermut, Attaveqarnermut Angallannermullu Naalakkersuisoq Jens B. Frederiksen oqarpoq.

Moriusaq pillugu Naalakkersuisut inassuteqaatissaat Naalakkersuisuni sisamanngorpat tulliani oqaluuserineqassaaq.

Inassuteqaatiginiagarli qanoq imaqarnersoq Naalakkersuisunut ilaasortap Jens B. Frederiksen-ip massakkut oqaatigisinnaanginnerarpaa.

Aamma atuaruk