Morfininik Nuummi tillittoqarpoq
apriilip 24-at 2007 13:00
Nuummi umiarsuit ilaannit kapuinermut atorneqartartunik morfininik igalaaminernik puulinnik tillittoqarsimammat, politiit mianersoqqusipput, morfini taanna kukkusumik atorneqaallakkuni toqqutigineqarsinnaammat.
Morfini umiarsuarmit M/S Adolf Jensenimit ippassaq ataasinngornermi ualikkut sisamat ullaarlu nalunaaqutaq arfineq-pingasut akornanni tillinneqarsimassangatinneqarpoq.
Morfinit poortukkani qulinik imaqarsinnaasuni marlunniippoq, morfinillu puua igalaamineq ataaseq 2 milliliterimik imaqarpoq.
Tillinneq politiinit paasiniarneqarpoq, ilisimannittoqarunilu, tillissimasunilluunniit pasitsaassisoqarsimaguni, Nuummi politiinut saaffiginnittoqarsinnaavoq, Nuummi politiit oqarasuaataat tassaavoq 32 14 48, tassa 32 14 48.
