Montrealimi neriniartarfinni nerisassat allassimaffianni puisip neqaa ilanngunneqarpoq
Canadami guvernøri, Michaelle Jean, Nunavummi nalliuttorsiornermi sapaatip akunnerani kingullermi ooqanngitsumik puisip uummatitortoq tusarliupparput. Taama pisoqareersorlu Montrealimi neriniartarfiit arlallit puisip neqaanik sassaallertalerput.
Neriniartarfiit nalunnnginneqarluartut marluk puisip neqaanit nerisassianik assigiinngitsunik nioqquteqalerput, soorlu puisip neqaanit tinguaralianik, pølsinik, pizzat puisip neqaanik akullit taavalu puisip neqai pujuukkat.
Puisip uummatai arlalinnit nererusunneqartaraluarput. soorlu guvernøri taamaaliortoq, neriniartarfimmilli, Les Iles en Villemik, piginnittoq, Andree Garcia, oqarpoq, puisip uummataanik sassaalliisaratik, kisiannili puisip neqaanik siatsisarlutik, aamma ooqanngitsumik aserortikkamik, tassa tartarinik, sassaalliisarnerarput. Puisip neqitoriartortut amerlaqaat, Nunavimmimi Quebecimilu puisit mamarineqartorujussuupput, Andree Garcia unnersiorpoq.
Aammali nuanniitsortaqarpoq, Montrealimili neriniartarfinnik piginnittut taakku marluk Eurpamiit e-mailerpassuarnik nassitsittalersimapput, pingaartumik Frankrigimiit Belgiamiillu, toqunneqarnissaminnik sioorasaarneqarlutik.
Piginnittup aappaa tusagassiorfinnut ima oqarpoq:
- Sioorasaarteqaagut, kisianniuna iliuusivut inuit paaserusunngikkaat, puisip neqaa peqqinnartorujussuuvoq, sioorasaarisulli puisit piniarneqartarnerat kisiat eqqarsaatigaat. Uumasunik illersuiniaqatigiit oqarput, namminneq sioorasaarisuunatik.
