Taasinerit 98,3 procentii kisinneqareersullu, inernerugallartut takutippaat partiit sisamat, maanna naalakkersuisoqartitsisumut, Kommunistpartiimut illuatungiliuttuusut, inissanik tallimanik Kommunistinit amerlanerusunik pissarsissagunartut. Moldovami qinersinermut isumalioqatigiissitat taama ilisimatitsipput.
- Kommunistit maanna illuatungiliuttunngortariaqarput, Moldovallu Europamut ilanngunniarneranut akornusersuiniarnertik unitsittariaqarpaat, illuatungiliuttut, De Liberalit, siulittaasuata tullia, Dorin Chirtoaca, oqarpoq.
Kommunistit partiiat, præsident Vladimir Voroninimit siulittaasuuffigineqartoq, ukiuni arfineq-pingasuni siuttooreerpoq, partiilu taanna aamma taaguunneqarnerpaavoq.
Kommunistit 45,1 procentimik taaguunneqarnerminni Moldovami partiini suli annersaapput, Inatsisartunili nutaani 48-nik issiatitaqarnerat amerlanerussuteqarnissaannut naammanngilaq. Partiit sisamat naalakkersuisoqatissaminnik suli toqqaanngillat, suleqatigiinnissaminnilli kissaateqarput.