Mogens Glistrup toquvoq
Kalaallit Nunaannut ministereqarfik atorunnaarseriarlugu Kalaallit Nunaat USA-mut tuniniarsiuk !
Ilaatigut oqaatsit tamakku atorlugit Mogens Glistrup 70-ikkut aallartilaarneranni Danmarkimi naalakkersuinikkut sulinini aallartippaa. Indiami Killermi qeqertanik Danmarkip tunisineratuut Danmarki aningaasarpassuarnik sipaaruteqassaaq USA-llu akiliutai naalagaaffiup karsianut iluaqutaassaqisut taamani Glistrupi isumaqarpoq.
Glistrupip aamma taamani Danmarkip Illersornissamut ministereqarfiata oqarasuaatikkut nammineq akisartumik taarsernissaa siunnersuutigaa, oqarasuaatikkut russisut oqaqqusiinnarluni: ”Tunniutiinnarpugut”.
1973-imi Folketingimut qinersisoqarmat Glistrupip Fremskridtspartii aallarteqqammisaa ilaasortaminik 28-nik isertitaqarpoq. Partii taanna maannakkut partiip Dansk Folkepartiip siuleraa.
Glistrupi ersarissunik marlunnik anguniagaqarpoq, tassalu akileraarutit peerneqarnissaat Danmarkimilu nunasisartut akiorneqarnissaat, taamaammallu taakkua kingunerisaannik akileraartarnermut inatsisinik unioqqutitsisimasutut kiisalu ammip qalipaataa pillugu immikkoortitseqqusaannginnermut malittarisassanik unioqqutitsisimasutut sivisuumik paarnaarussaasarluni. Soorlu islamisiortut arnartaannik nunanut allanut tusiniaaqqusinermi kingorna
Oqariartuutit taamaattut qinersisartut ingasagimmatigit ukiorpassuarni kingullerni naalakkersuinerup iluani sunniuteqarunnaarsimagaluarluni, oqaatigineqartariaqarpoq nunasisartut akiorniarneqarneranni ulloq manna tikillugu sunniuteqaqataasoq.
Mogens Glistrup 82-inik ukioqarluni ippassaq toquvoq.
