Mobilit ulapaartussanngorput
SMS Festival mobil-inut sammititaavallaanngikkaluarpoq, tassami naalisaaneruvoq Saqqaq Midnight Sun Festivalimik. Festivalip pingaarnertut siunertaraa kulturikkut pikialaartitsinissaq Qeqertarsuup tunuaniit peqataaffigineqartumik.
Ukiormannali festivaleqarnissaani mobil-it atorneqangaatsiartussanngorput sisamanngorneq juulip arfineq aappaanniit sapaat juulip qulingat tikillugu pikialaartitsinissami. Peqataasussat sisamanngornermi ualikkut suliassartik tigussavaat tassalu nalunaaquttap akunnerisa 60-it ingerlaneranni mobil-ip filmiliuutaa atorlugu assilisanik naatsumik filmiliornissaq minutsit qulit missaliorlugit takissuseqartussamik.
- Nalunngilarput inuusuttut filmiliornissamut isumassarsiarpassuaqartartut, tamakku inunnit amerlanerusunit takuneqarsinnaalernissaat anguniarlugu taamatut unammisitsiniarpugut, aaqqissuisut sinnerlugit Georg Olsen KNR-imut taama oqarpoq.
Aamma allanik pisussaqarpoq kulturikkut pikialaartitsinerit nipilersornerillu ingerlanneqassammata nunaqarfimmi alianaatsorsuarmi Saqqami Vajgatip sulluanut isikkivilimmi.
Aaqqissuisut maanna sulissutigaat siunissami festivali annertusarniarlugu taamalu nunaqarfiup silatinnguani tupersimaarnertut aaqqissuuttalerlugu.
Pisussat takusinnaavatit linki ataaniittoq toorlugu.
