Mittarfiup ukiumi matusarnera kinguneqapilussinnaavoq

Kulusuup aputeqarpallaarnera peqqutigalugu mittarfik ulluni marlunni matoqqassasoq nalunaarutigineqarpoq. Tassalu Ammassallip Kommunianut attaveqarniarneq ajornarsigallarpoq. Tasiilameersup Jakob Abelsenip aarleqqutigaa, aputaajaatit nutaanngilisut taarserneqanngippata, tamanna inuup inuuneranik naleqarsinnaasoq.
novembarip 05-at 2008 17:04

- Naak aput 50 centimeteriinnarnik issussuseqaraluartoq, aputaajaanermut atortut nutaanngilivallaarsimammata aputaajaaneq pissusissamisut ingerlanneqanngilaq. Taava ukioru qanoq ajornartorsiortoqartigissanersoq takorloorsinnaavarput, Jacob Abelsen oqarpoq.

Ammassallip Kommunianiit Kalaallit Nunaata sinneranut Islandimullu angalassagaanni Kulusummi mittarfik aqqusaaqqaarneqartariaqarpoq. Tassalu Mittarfik matummat angallanneq unippoq, nioqqutissanik timmisartukkut pilersorneqarneq aammali inunnik angallassineq eqqorneqarlutik.

- Piaartumik iliuuseqartoqanngippat, inuup inuuneranik naleqarsinnaanera uanga aarleqqutigaara, Tasiiliarmiu Jakob Abelsen oqarpoq naalakkersuisullu kaammattorlugit Mittarfeqarfiit suleqatigalugit angallaffiusinnaagallartillugu aputaajaanermut atortut nutaanik taarseqqullugit.

Mittarfeqarfinni immikkoortoqarfimmi pisortap, Ole Gebeche-p uppernarsarpaa, Kulusuup Mittarfiani aputaajaatit nutaanngilisut.

- Aputaajaasinnaapput, kisianni nutaanngiligamik unittoortarput, Ole Gebeche oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq