Mittarfiup terminalia nutaaq kiisami ammarpoq. Malittarisassalli nutaat piffissamik atuinarsinnaasut
Nuummi mittarfimmik sanaartornermi ippassaq killiffik pingaaruteqarpoq. Mittarfimmi suli piariivinngikkaluartoq terminali tassa aallariartortarfiullunilu tikittarfik nutaaq atulersinneqarpoq, tamannalu angalasut siulliit alutorsaatigaat.
Tamannali aamma aallarnissamut akunnerit marluk sioqqullugit tunniussereernissamik ilaqarpoq, tamannalu nutaajuvoq. Nunanimi allani mittarfiit allat assigalugit aallannginnermi nassatat misissoqqaarneqassapput, tamannalu angalasut KNR-ip oqaloqatigisaasa assigiinngitsunik isummerfigaat.
- Sivisugilaarpara, una ilaa perornikuuvugut 1 tiimi sioqqullugu mittarfimmeereertartussaalluta. Una 2 tiiminngornera sungiussassaassooq, nunarsuarmiooqataalerattami asuki, kisianni sivisugilaarpara, Danmarkimut angalalersoq Marco Geisler Sikemsen oqarpoq.
Elisabeth Abelsen Larsenip siusinnerusukkut takkutereersimanissaq aamma maluginiarpaa.
- Siusinnerulaarpoq, illoqarfissuanngornikuummat aappaatigut taanna aamma piareersarluarnissamut iluaqutissartaqarparsippoq.
Angalasussat amerlanngitsut piffissarlu sivisooq
Angalasussaat ilaata Ludvig Fleischerip utaqqinissaq aamma sivisunerarpaa.
- Isumaqarpunga sivisuallaangajattoq, soorlu Danmarkimi kastruppimi aallariartortarneq eqqarsaatigalugu inukinneroqimmat manna. Kisianni imaassinnaasoq sulisukinerummat taamatut pisariaqartisimasut, aamma paasilluarsinnaavakka sulisukinneq peqqutigalugu taamak pissappata, kisianni piffissamik atuinarpallaangajappoq.
Aallariartoqqaartut piffissamik atuinerungaluarlutik, isersimaffigisartik alutoraat:
- Iluaqaaq inissaqarluarluni siullerpaamillu taamatut aallariartorluni alutornarpoq nuannerpoq, qanorli iluamik inissilluaruni, Elisabeth Abelsen Larsen taama oqarpoq
Aamma Marco Geisler Sikemsen qangattannginnermini ima takorluugaqarpoq:
- Imatut takorluugaqanngilanga kisianni kanna pissangagilaarpara qanoq isikkoqassanersoq, taxfree cafellu naatsorsuutiginerpaavakka, neriuppunga tamakkunannga peqartoq.
Allannguutit sungiunniagassaasut
Timmisartumik angalasussat qaammatip ataatsip siulliup ingerlanerani terminalimit nutaamit mittarfitoqqamut timmisartup suli tikiffigalugulu aallartarfigisaanukarlutik bussinut ilaasassapput. Avatangiisillu nutaat tamanut sungiunniagassaassapput.
- Nutaajoruttormat suli ingerlatsisut tammartajaarlutik, allamut iserfissamut tikiukkaluarpaatigut. Taava uterlutik allap isertarfikkut isertippaatigut tassa sulisut allaat nutaajoruttormat tammartajaartarput, Ludvig Fleischer taama oqarpoq.
