Mittarfissanut suliniutini suliarinnikkusuttut pingasut Kalaallit Airports neqeroorfigaat
Nuummi Ilulissanilu suliniutini annertuuni alloriarluni ingerlaqqittoqarpoq, tallimanngormat Kalaallit Airportsip suliniutini annertuuni neqeroorutinik pissarsimmat.
Tusagassiuutinut nalunaarummi Kalaallit Airports taama allappoq.
Kalaallit Airportsip pisortaanerata Peter Wistoftip neqeroorutit nunaannaarutigai.
- Sulisitsisunit pingasunit neqeroorutit assut nunaarutigaavut, taakku tamarmik nunap ilaani sanaartorfigissallugu ajornakusoortuni annertuumik misilittagaqarput, tusagassiuutinut nalunaarummi Peter Wistoft oqarpoq, nangillunilu:
- Massakkut suliaq pissangartoq, tassa neqeroorutit takkussimasut misissorluarnissaat aallartissavarput suliarineqarnissaanullu isumaqatigiissummik isumaqatigiinnialiassalluta. Qaammammi maani kingusinnerusukkut siulersuisut ataatsimiissapput sulisitsisorlu Nuummi Ilulissanilu mittarfissanik sanaartortussaq toqqassallugu, mittarfissallu sanaartorlugit aallartinneqarnissaat ukiamut pissasoq suli siunertaavoq, Peter Wistoft oqarpoq.
Suliffiit arfinillit neqerooruteqarnisssamut akuerisaapput, neqeroorutilli pingasuinnaat tiguneqarsimapput.
BAM International Hollandimeersoq, Pennecon Dexter Joint Venture Canadameersoq kiisalu Munck Gruppen Danmarkimeersoq neqerooruteqartuupput, taavalu neqerooruteqartussarsiuussinermi siusissukkut Aarslef tunuarpoq, kingunerisaanillu MT Højgaard aamma China Communications Construction Company Ltd. aamma tunuarput.
