ASSIT: Mittarfiliortiternissaq Sermersuup nalliuttorsiutigaa

Nipilersortut, pølsit inuillu qiimasut. Inatsisartut ataatsimiittarfiata silataani nalliuttorsiortoqarpoq.

Mittarfiliortiternissamut amerlanerussuteqartut tapersiinerat Kommuneqarfik Sermersuumi kommunalbestyrelsimut ilaasortat nuannaarutigalugu innuttaasunut qaaqqusimmata Simon Lynge appisimaartut ilagaat.

AAMMA ATUARUK Aalajangiisoqarnissamut peqataatinneqarnerput naammassimanngilaq

Kommuneqarfik Sermersuup eqqaaniit aallartittumik Inatsisartut ataatsimiittarfiata silataanut ingerlaaqatigiittoqarpoq. Nuummi najugaqartut politikkikkullu suliaqartut Siumumeersut, Demokratineersut, Inuit Ataqatigiinneersullu tapersiinertik takutinniarlugu ingerlaaqataapput.

Jørgen Boassen Qaqortormiu ingerlaaqataasut ilagaat, ullorlu pingaaruteqartoq oqarpoq:

AAMMA ATUARUK Mittarfinnut pilersaarut pillugu ilisimasaqarnerulerit

- Qaqortuminngaanneerama tusarnaariarpunga. Qaqortup nunattalu ineriartorteqqinnissaa, naalagaaffeqatigiinnerpullu pillugu akuersissutigineqarnera tusaarusukkakku. Qangalili tamakku isumagineqartussaagaluit aatsaat maanna isumagineqalerput. Aamma soorunami siunissami namminiilerumaarpugut, tamanna takkukkumaarpoq mittarfissat aqqutigalugit, Jørgen Boassen oqarpoq.

Ingerlaaqatigiinneq naammassimmat Inatsisartut ataatsimiittarfiata saani pølsillertoqarpoq Simon Lyngelu appisimaarluni. Mittarfissualiornissallu oqallisigineqarnerat kisiat pinnagu aamma takkuttoqarpoq.

AAMMA ATUARUK Oqaluttuarisaanermi pingaarutilimmik aalajangiisoqalersoq

- Pølsitoriartortugut ullumi illigigatsigit.

Maani susoqarnersoq nalunngiliuk?

- Tassa atsiulerunaramik, Frederik Brummerstedt oqarpoq.

Ingerlaaqatigiinnermi allagartarsuit 2200 meterinik allaqqasut paatsoorneqarsinnaanngillat, tassa Nuummi mittarfiup tallineqarnissaa siunertaralugu ingerlaaqatigiittoqarmat. #2200 allagartarsuarni takussaavoq.

AAMMA ATUARUK Mittarfiit pillugit isumaqataasut isumaqataanngitsullu tunngavilersuutaat aajuku